Urukiko rwa Gisirikare muri Congo Kinshasa, rwakatiye urwo gupfa Christian Ngoy Kenga Kenga wahoze ayobora Polisi ya kiriya gihugu nyuma yo guhamwa n’icyaha cyo kugira uruhare mu kwica impirimbanyi Floribert Chebeya n’umushoferi we Fidèle Bazana.
Uretse ubwicanyi, Kenga Kenga yanahamijwe n’ibyaha byo gutoroka akazi no kunyereza intwaro, anirukanwa muri Polisi.
Ngoy Kenga Kenga wari umaze igihe afatwa nk’uwatorotse ubucamanza yafatiwe i Lubumbashi mu 2020, yoherezwa gufungirwa i Kinshasa no gukurikiranwa kuri uru rubanza.
Undi mupolisi wahamwe no kuba mu bakoze buriya bwicanyi ni Jacques Mugabo wakatiwe imyaka 12 y’igifungo ndetse yirukanwa muri Polisi.
Mugabo uyu we yafatiwe i Lubumbashi muri Gashyantare umwaka ushize, nyuma y’imyaka 11 ahigishwa uruhindu.
Uru rubanza kandi rwanaburanishijwemo Paul Mwilambwe, umupolisi wari warakatiwe urwo gupfa adahari mu 2011 wagizwe umerewe.
Milambwe wamaze imyaka myinshi mu buhungiro muri Senegal no mu Bubiligi yahungutse mu 2021 aza gutanga ubuhamya muri uru rubanza nyuma yo kwizezwa umutekano.
Mu Ukuboza 2021 by’umwihariko Milambwe ubwo yari imbere y’ubutabera, yashinje uwari perezida Joseph Kabila n’uwari umukuru w’igipolisi General John Numbi ko ari bo batanze amabwiriza yo kwica Floribert Chebeya.
Joseph Kabila ntabwo yigeze agezwa mu nkiko kubyo yashinjwe mu rupfu rwa Chebeya, n’ubwo byasabwe kenshi n’imiryango imwe itegamiye kuri leta.
Cebeya wahoze ari Perezida w’ishyirahamwe riharanira uburenganzira bwa muntu “La Voix des sans Voix”, yishwe ku itariki ya 01 Kamena 2010 ari kumwe n’uwari umushoferi we witwa Fidèle Bazana.
Chebeya yari yatumiwe i Kinshasa ku biro bya Polisi ya RDC, kugira ngo abonane n’uwari uyoboye Polisi witwa John Numbi.
Uyu Numbi muri 2015 yagejejwe imbere y’ubutabera, ahakana ko atigeze atumaho Chebeya ngo babonane, gusa uruhande rwaburaniraga Floribert Chebeya rwo rukavuga ko ari we uza ku isonga mu bafite icyo bazi ku rupfu rw’iriya mpirimbanyi.
