Ingabo za Uganda zasubukuye ibikorwa byazo muri RDC

Ingabo za Uganda (UPDF) mu gitondo cy’uyu wa 1 Nyakanga 2022 zibutse zisubukura ibikorwa byazo byo kurwanya umutwe w’iterabwoba wa ADF ukorera mu burasirazuba bwa Repubulika ya Demukarasi ya Congo (RDC).

Ikinyamakuru Chimpreports kitaratangaza amakuru arambuye kuri ibi bikorwa, gisobanura ko ibitero bya UPDF byo muri iki gitondo byakozwe hifashishijwe indege n’imbunda nini zirasa kure.

Izi ngabo zisubukuye ibi bikorwa byahawe izina rya Operation Shujaa nyuma y’ibyumweru bibiri Perezida akaba n’Umugaba w’Ikirenga, Yoweri Museveni, asabye ko ziba zibihagaritse.

Ihagarikwa ry’ibi bikorwa ryatangajwe n’umuhungu usanzwe ari Umugaba w’ingabo zirwanira ku butaka, Lt Gen. Muhoozi Kainerugaba tariki ya 15 Kamena 2022.

Gen. Kainerugaba yagize ati: “Perezida Museveni yantegetse n’izindi ngabo kuguma mu birindiro byacu biri muri RDC. Tugomba guhita tubikora! Nta ngendo ingabo zemerewe gukora muri Operation Shujaa kugeza hatanzwe irindi bwiriza!”

Iki cyemezo cyafashwe mu gihe Inteko ishinga amategeko ya RDC yashinjaga ingabo za Uganda gufasha umutwe witwaje intwaro wa M23 gufata umujyi wa Bunagana tariki ya 13, no mu gihe hari hategerejwe icyemezo cya Perezida wa Kenya unayoboye umuryango w’akarere ka Afurika y’iburasirazuba ku mitwe yitwaje intwaro ikorera muri RDC.

Inkuru bifitanye isano https://bwiza.com/?Museveni-yategetse-ingabo-za-Uganda-kuba-zihagaritse-kurwanya-ADF