Gen. Cirimwami uherutse kwamburwa imodoka na M23 yimuriwe muri Ituri

Gen. Maj. Peter Cirimwami uherutse kwamburwa imodoka n’abarwanyi b’umutwe witwaje intwaro wa M23 mu mirwano ikomeje kubera muri teritwari ya Rutshuru, yahinduriwe akazi.

Hashingiwe ku mabwiriza y’Umugaba w’Ikirenga akaba n’Umukuru w’Igihugu, Perezida Félix Tshisekedi, Gen. Célestin Mbala uyobora ingabo za Repubulika ya Demukarasi ya Congo (RDC), yasimbuje Cirimwami Lt Gen. Bitangalo Bulime ku mwanya wa Komanda w’ibikorwa bya Sokola 2.

Gen. Cirimwami yari ashinzwe ibikorwa by’igisirikare byo kurwanya imitwe yitwaje intwaro ikorera mu ntara ya Kivu y’Amajyaruguru by’umwihariko M23 ikomeje kugaragaza imbaraga nyinshi.

Uyu musirikare muwe, yoherezwa kuyobora ibikorwa by’igisirikare mu karere ka 33, mu ntara ya Ituri, ahakorera umutwe w’iterabwoba wa ADF ukomoka muri Uganda, na CODECO ikomoka imbere mu gihugu.

Lt. Gen. Philemon Yav Irung wigeze kuyobora Zone ya 3 muri Minembwe yagizwe Komanda wihariye w’ibikorwa byo kurwanya M23. Ubusanzwe yari umuhuzabikorwa wabyo.

Tariki ya 21 Kamena 2022 ubwo imirwano y’ingabo za Leta na M23 yari irimbanyije mu gace ka Kabindi muri Rutshuru, ni bwo Gen. Cirimwami yisanze imbere y’abarwanyi b’uyu mutwe witwaje intwaro, ata imodoka y’igisirikare y’ubwoko bwa Jeep.

Gen. Cirimwami yambuwe iyi modoka nyuma y’iminsi 9 Maj. Eric Kiraku Mwisa wari ukuriye abasirikare bamurinda.