Minisitiri w’Intebe wa Somalia, Hamza Abdi Barre, yatangaje ko Muktar Robow wahoze ari umuyobozi wungirije w’umutwe wa Al Shabaab akanawubera umuvugizi yagizwe Minisitiri w’iyobokamana.
Muktar Robow yahawe izi nshingano nyuma y’igihe gito avuye muri gereza, dore ko yafunzwe imyaka ine kubera gushwana na Mohamed Abdullahi Mohamed ‘Farmajo’ wahoze ari Perezida wa Somalia.
Muri 2017 ni bwo uyu mugabo yatangaje ku mugaragaro ko yitandukanyije na Al Shabaab, mu gihe Amerika yari yarashyizeho ishimwe rya $ miliyoni 5 ku wari gutanga amakuru y’aho aherereye.
Mu mpera za 2018 ubwo yapangaga kwiyamamaza mu matora y’imbere muri Somalia, yatawe muri yombi ashinjwa gushaka guteza umutekano muke.
Icyo gihe Guverinoma ya Farmajo yamushinjaga kuba yarimo ategura inyeshyamba mu gace ka Baidoa gasanzwe ari umurwa mukuru w’akarere ka Bay gaherereye mu majyepfo ashyira uburengerazuba bwa Somalia.
Itabwa muri yombi rya Robow ryakuruye imyigaragambyo ikomeye muri kariya karere, abigaragambya batwika amafoto ya Farmajo bamushinja kubivangira mu matora.
Muktar Robow yinjiye muri Guverinoma ya Somalia nyuma y’igihe gito Perezida w’iki gihugu, assan Sheikh Mohamud aciye amarenga y’uko Guverinoma ye ishobora kugirana imishyikirano na Al Shabaab; gusa avuga ko bizaba mu gihe nyacyo.
