Ikipe ya Simba Sports Club yo mu gihugu cya Tanzania, yemeje ko yamaze gutandukana na rutahizamu w’ikipe y’igihugu ‘Amavubi’, Meddie Kagere, nyuma y’imyaka ine ayikinira.
Kagere yari umukinnyi w’iyi kipe y’i Dar es Salaam nyuma yo kuyigeramo akubutse muri Gor Mahia yo muri Kenya.
Simba yemeje aya makuru ibinyujije ku rubuga rwayo rwa Twitter.
Iyi kipe yavuze ko yo na Kagere batandukanye ku bwumvikane.
Uretse Kagere wasezerewe n’iyi kipe, yanemeje ko yanasezereye abandi bakinnyi babiri barimo umunya-Uganda Taddeo Lwanga usanzwe akina hagati mu kibuga cyo kimwe n’Umukongomani Chrispain Mugalu utaha izamu.
Mu myaka ine Kagere yari amaze muri Simba, yari amaze kuyitsindira ibitego 66 bimugira umukinnyi wa mbere w’umunyamahanga wayitsindiye ibitego byinshi.
Uyu rutahizamu kandi yatwaranye n’iyi kipe ibikombe bitandukanye birimo bitatu bya shampiyona ya Tanzania.
Amakuru kuri ubu aravuga ko Kagere nyuma yo gutandukana n’iyi kipe ashobora kwerekeza muri Singida United yo muri Tanzania n’ubwo hari n’andi makuru yamuzanaga muri APR FC.
