Dr Mukwege ntiyishimiye kumva ingabo z’u Burundi zageze muri RDC

Umuganga wo muri Repubulika ya Demukarasi ya Congo (RDC) uri mu mpirimbanyi z’uburenganzira bw’ikiremwamuntu, Dr Denis Mukwege, yagaragaje ko atishimiye kumva ingabo z’u Burundi zageze mu gihugu cyabo.

Ingabo z’u Burundi bivugwa ko zirenga 600 mu gitondo cya tariki ya 15 Kanama 2022 zageze mu kigo cya gisirikare cya Luberizi giherereye muri teritwari ya Uvira, intara ya Kivu y’Amajyepfo.

Umuvugizi w’ibikorwa by’igisirikare cya RDC muri iyi ntara bizwi nka Sokola 2, Lt Marc Elongo, yasobanuye ko izi ngabo zagiye muri Kivu y’Amajyepfo muri gahunda y’umuryango w’akarere ka Afurika y’iburasirazuba (EAC) yo kurandura imitwe yitwaje intwaro.

Lt Elongo yagize ati: “Guhera kuri uyu wa Mbere, ingabo z’u Burundi zinjiye mu karere ka Sokola 2 muri Kivu y’Amajyepfo. Izi ngabo ziri ku kigo cy’imyitozo cya Luberizi kandi zaje muri gahunda yemejwe n’abakuru b’ibihugu bya EAC.”

Dr Mukwege mu butumwa yatangarije ku rubuga rwa Twitter kuri uyu wa 16 Kanama 2022, yagaragaje ko kuba ingabo z’u Burundi zagiye muri RDC ari igisebo kuri gihugu cyabo.

Yagize ati: “Kuza kw’ingabo z’u Burundi mu butumwa bwa EAC kwerekana ugutsindwa kwa dipolomasi ya RDC mu karere. Ni ikindi gisebo ku gihugu cyacu. Duhagarike politiki yo kongerera imbaraga urwego rw’umutekano twifashishije Leta ziwuhungabanya, tuvugurure igisirikare cyacu kugira ngo kibe ikinyamwuga kandi gikora.”

Dr Mukwege ni umwe mu barwanyije ku ikubitiro gahunda ya EAC yo kohereza ingabo z’ibihugu biyigize mu gikorwa cyo kurwanya imitwe yitwaje intwaro ikorera mu burasirazuba bwa RDC. Yagaragaje ko muri ibi bihugu harimo ibyabaye intandaro y’umutekano muke mu gihugu cyabo, bityo bidakwiye kuzohereza.

Uyu muganga wahawe igihembo cy’amahoro cyitiriwe Nobel mu 2018, abona icyo Leta ya RDC ikwiye gukora cyonyine ari ukubaka igisirikare cyabo, kugira ngo kizashobore gukemura iki kibazo cy’umutekano muke, kitiyambaje imbaraga zo hanze.