Babu Owino usanzwe ari umudepite mu nteko ishinga amategeko ya Kenya, yavuze ko abakuru b’ibihugu bitandukanye byo muri Afurika bihutiye kwemeza ko Dr William Ruto yatsinze amatora ku mwanya wa Perezida.
Uyu munyapolitiki uhagarariye Inteko mu karere ka Embakasi East, mu butumwa yatangarije kuri Twitter ku wa 16 Kanama 2022, yagaragaje ko abayobozi b’ibihugu bari gushimira Ruto bari kwivanga mu bibazo bwite bya Kenya.
Yagize ati: “Mfashe uyu mwanya kugira ngo nihanangirize ibinyamakuru, indorerezi na bamwe mu baperezida bo muri Afurika bafashe umwanya wabo bashimira Ruto nk’uwatsinze amatora ya Perezida. Ngira ngo mbabwire kandi mbamenyeshe ko Kenya ari igihugu cyigenga, gifite amategeko n’amabwiriza yacyo. Ntabwo dushaka ko mwivanga mu bibazo by’Abanyakenya.”
Owino ushyigikiye ihuriro Azamio la Umoja ry’imitwe ya politiki ririmo uwa Raila Odinga wari uhatanye na Ruto, avuga ko ari we watsinze amatora. Ati: “Uko ibintu bihagaze, tuzi ko Raila Amolo Odinga ari we Perezida watowe kandi vuba cyane bizagaragazwa n’urukiko rw’ikirenga.”
Nyuma y’impaka zari zabanje hagati y’abagize komisiyo yigenga y’amatora muri Kenya, Perezida wayo, Wafula Chebukati tariki ya 15 Kanama yatangaje ko Ruto yatsindiye uyu mwanya, agize amajwi 50.49%, Odinga agira 48.85%.
Ibyavuye muri aya matora Raila Odinga yarabyanze, atangaza ko aritabaza urukiko kugira ngo rumukiranure na Chebukati wabitangaje.
