Uganda iravuga ko ifite abarwanyi ba M23 basaga 40 baherutse guhunga imirwano yongeye kubura muri Repubulika iharanira Demokarasi ya Congo muri iki cyumweru nk’uko igisirikare cya Uganda cyabitangaje kuri uyu wa Kane.
Umuvugizi w’igisirikare, Richard Karemire, yabwiye Reuters dukesha iyi nkuru ko abarwanyi 44 ba M23 bafungiye mu kigo kiri mu majyepfo y’uburengerazuba bwa Kisoro, ariko ahakana ibirego bya Congo bishinja Uganda kuba ari yo iri guha ubushobozi uyu mutwe ngo wubure imirwano.
Umutwe wa M23 umaze igihe urwanya ubutegetsi bwa Congo, wakubiswe inshuro n’ingabo z’ibihugu bitandukanye mu 2013 abarwanyi bawo bahungira muri Uganda abandi bahungira mu Rwanda.
[xyz-ihs snippet=”google-pub”]
Guhera mu kwezi kw’Ugushyingo, guverinoma ya Congo yakunze gushinja Uganda kureka aba barwanyi bahahungiye bagasubira mu burasirazuba bw’igihugu kongera kubyutsa umutwe. Imirwano iheruka guhuza ingabo za leta na M23 yabereye kuva kuwa Mbere ushize kugeza kuwa gatatu muri Rutshuru ho muri Kivu y’Amajyaruguru, hafi ya Bunagana, umujyi uhana imbibe n’igihugu cya Uganda.
Umuvugizi w’ingabo za Congo aha hantu, Capt. Guillaume Djike, nawe yabwiye Reuters ko ingabo za FARDC zivuganye abarwanyi 16 ndetse zigata muri yombi abandi 5 muri iyo mirwano. Yakomeje avuga ko ingabo za leta zabashije gusubiza inyuma igitero cy’inyeshyamba zigasubira inyuma zijya aho zari zaturutse.
Mu kwezi gushize, Uganda yari yatangaje ko yafashe abahoze muri M23 bagerageza kujya muri Congo baturutse mu nkambi bari bacumbikiwemo kuva mu 2013. Abayobozi bakaba baratangaje ko batazatuma aba bongera gushoza imirwano baturutse muri Uganda.
Umuvugizi w’igisirikare, Karemire rero yahakanye ko inyeshyamba zateguye igitero cyo muri iki cyumweru zaturutse muri Uganda kuko ngo nta kimenyetso kigaragaza ko bavuye muri Uganda.
Guverinoma ya Congo yabwiye Umuryango w’Abibumbye ko kubura umutwe kwa M23 gushobora kubangamira amasezerano yagombaga kugeza ku matora y’umukuru w’igihugu hagati ya leta n’abatavuga rumwe nayo.
Kanda hano ujye ubona amakuru yihuse kandi kugihe kuri Facebook no kuri twitter
Â
Dennis Ns./Bwiza.com
