Ikipe ya Manchester United yo mu Bwongereza yageze ku bwumvikane na Real Madrid yo muri Espagne bwo kugura umunya-Brésil Casimiro Carlos Henrique uzwi nka Casemiro.
Umunyamakuru Fabrizio Romano yatangaje ko amakipe yombi kuri ubu ari gutegura kontaro, nyuma y’uko Madrid yemeye bid ya miliyoni 60 z’ama-Euro zigomba kwiyongeraho izindi 10 Manchester United yemeye kuyiha.
Uyu munyamakuru usanzwe akorera Televiziyo ya Sky ndetse n’ikinyamakuru The Guardian, yunzemo ko Casemiro agomba gusinya amasezerano y’imyaka ine ashobora kwiyongeraho undi umwe akagera muri 2027.
Casemiro w’imyaka 30 y’amavuko, kuri ubu ntari mu bakinnyi umutoza Carlo Ancelotti yiyambaje mu mukino w’umunsi wa kabiri wa shampiyona ya Espagne Real Madrid ihuriramo na Celta Vigo kuri uyu wa Gatandatu.
Uyu munya-Brésil yari umukinnyi w’iriya kipe y’i Madrid kuva muri 2013, nyuma yo kuyigeramo nk’intizanyo ya São Paolo y’iwabo.
Casemiro mu myaka icyenda yari amaze akinira Real Madrid, yatwaranye na yo ibikombe 18 birimo bitatu bya shampiyona ya Espagne, icya Copa Del Rey na bitanu bya UEFA Champions league.
Amakuru avuga ko uyu mukinnyi yafashe icyemezo cyo kuva muri Real Madrid, nyuma yo kumenya ko umwanya yari afite hagati mu kibuga hari gahunda yo kuwuha Umufaransa Aurélien Tchouaméni iriya kipe yaguze muri iyi mpeshyi imuvanye muri Monaco y’iwabo.
