RED Tabara itewe impungenge n’ingabo 600 z’u Burundi zoherejwe muri RDC

Umutwe witwaje intwaro wa RED Tabara urwanya ubutegetsi bw’u Burundi watangaje ko ingabo z’iki gihugu 600 ziherutse koherezwa muri Repubulika ya Demukarasi ya Congo (RDC) ziteye impungenge ku mutekano w’Abanyekongo.

Mu gitondo cya tariki ya 15 Kanama 2022, ni bwo ingabo z’u Burundi zageze muri teritwari ya Uvira, intara ya Kivu y’Amajyepfo, muri gahunda y’umuryango w’akarere ka Afurika y’iburasirazuba (EAC) yo kurwanya imitwe yitwaje intwaro, ikomoka muri RDC no mu bihugu by’abaturanyi.

Uyu mutwe mu itangazo wasohoye kuri uyu wa 22 Kanama wagize uti: “Ubutegetsi bwa CNDD-FDD bwohereje umutwe w’abasirikare 600, bongerewe muri Kivu y’Amajyepfo kugira ngo barwanye ku mugaragaro imitwe yitwaje intwaro y’imbere mu gihugu n’ikomoka mu mahanga, ariko by’umwihariko RED Tabara.”

Wakomeje uvuga ko ingabo z’u Burundi zisanzwe zisahura zikanatera imfu muri Kivu y’Amajyepfo mu gihe ziwurwanya. Uti: “Izi ngabo ziri gusahura zikanateza imfu muri RDC, ziri kongerera ubushobozi izirenga 1000 zisanzwe zigaba ibitero ku bacu barwanirira ukwibohora.”

RED Tabara isobanura ko abayigize bafashe intwaro kugira ngo ubutegetsi bw’u Burundi bwemere ko habaho amatora arimo ubwisanzure, aciye mu mucyo, adaheza kandi yimakaza demukarasi. Ngo mu gihe butaremera imishyikirano kugira ngo amatora abeho, uyu mutwe uzakomeza kurwanirira ukwibohora.

Uyu mutwe witwaje intwaro kandi wibajije niba abakuru b’ibihugu bya EAC bafashe icyemezo cy’uko ingabo zirimo iz’u Burundi zijya muri RDC, bazirengera ingaruka z’ibikorwa byazo mu gihe zihiga abarwanyi bawo muri Kivu y’Amajyepfo.

RED Tabara yashinzwe mu 2015 mu gihe cy’imvururu zatewe no kutumvikana kw’Abarundi kuri manda ya nyuma ya Pierre Nkurunziza wayoboye u Burundi kugeza ubwo yapfaga muri Kamena 2020.