Kenya: Igitero cy’abitwaje intwaro ku bagize komisiyo y’amatora cyaburijwemo

Komisiyo yigenga ishinzwe amatora muri Kenya ivuga ko inzego z’umutekano zaburijemo igitero abitwaje intwaro bashatse kugaba ku bayigize biteguraga gutanga ibisobanuro ku kirego cyatanzwe mu rukiko ku byavuye mu matora y’Umukuru w’Igihugu biherutse gutangazwa.

Ubutumwa busobanura iby’iki gitero, iyi komisiyo izwi nka IEBC yabushyize ku rubuga rwayo mu ijoro ry’uyu wa 22 Kanama 2022, igira iti: “Uyu munsi ahagana saa mbiri n’iminota 30 z’ijoro, itsinda ryitwaje intwaro zoroheje ryagerageje kugaba igitero ku bagize IEBC biteguraga gutanga ibisobanuro ku kirego cyatanzwe ku byavuye mu matora y’Umukuru w’Igihugu, i Nairobi. Ariko basubijwe inyuma n’inzego z’umutekano.”

IEBC yakomeje isaba Umuyobozi Mukuru wa Polisi ya Kenya gushyira iherezo kuri iyi myitwarire. Iti: “Komisiyo iramagana iki gikorwa cy’urugomo n’iterabwoba, inasaba Umukuru wa Polisi (IG) gushyira iherezo kuri iri honyora ry’itegeko.”

Iki gitero kigeragejwe ku munsi Raila Odinga yagerejeho ikirego mu rukiko rw’ikirenga, arusaba gutesha agaciro ibyavuye mu matora byatangajwe, asobanura ko yibwe amajwi bigizwemo uruhare n’Umukuru wa IEBC, Wafula Chebukati.