IGP Munyuza na Colonel Ruhunga uyobora RIB bari muri Singapore

Umuyobozi Mukuru wa Polisi y’u Rwanda, IGP Dan Munyuza n’Umunyamabanga Mukuru w’urwego rw’igihugu rw’ubugenzacyaha (RIB), Colonel (Rtd) Jeannot Ruhunga bari mu ruzinduko rw’iminsi ine muri Singapore.

Polisi y’u Rwanda isobanura ko uruzinduko rw’aba bayobozi n’abandi bo muri izi nzego babaherekeje rugamije gushimangira ubufatanye hagati y’inzego zishinzwe iyubahirizwa ry’amategeko mu bihugu byombi.

IGP Munyuza na Col. Ruhunga kuri uyu wa 23 Kanama 2022 bashyize umukono ku masezerano y’ubufatanye buri wese yagiranye na Komiseri Mukuru wa Polisi ya Singapore, Hoong Wee Teck.

Ibyibanzweho muri aya masezerano ni uguteza imbere ubushobozi bw’izi nzego binyuze muri gahunda zirimo amahugurwa no kungurana ubumenyi ndetse no kurwanya no gukumira ibyaha ndengamipaka.