Umuvugizi w’agateganyo w’igisirikare cya Nigeria, Brig. Gen. Folorunso Oyinlola yatangaje ko kurandura umutwe w’iterabwoba wa Boko Haram bizagitwara imyaka igera kuri 30.
Brig. Gen. Oyinlola yabitangarije mu nama y’akarere yerekeye umubano hagati y’igisirikare n’abaturage, yabereye muri Benin kuri uyu wa 23 Kanama 2022 nk’uko ikinyamakuru Sahara Reporters.
Uyu musirikare yasobanuye ko Boko Haram ari umutwe w’iterabwoba Leta yari ifite gahunda yo kurandura burundu kuva ku butegetsi bwa Olusegun Obasanjo, Alhaji Mohammed Yusuf wari umuyobozi wawo aricwa, ariko ntiwahagarika ibikorwa by’iterabwoba.
Kuri we, kurwanya umutwe w’iterabwoba si ibintu byoroshye byakorwa mu kanya nk’ako guhumbya. Ati: “Iterabwoba si ikintu twakuraho dukoresheje urutoki. Riba muri twebwe. Ntabwo dushobora kurasa Leta ya Edo yose ngo turarwanya Boko Haram.”
Yakomeje asobanura ko kurandura uyu mutwe bizatwara imyaka igera kuri 30, mu gihe abakiri bato mu gisirikare bazaba barahawe ubumenyi buhagije. Ati: “Tuzakenera byibuze imyaka 30 kugira ngo tubashe gutsinda Boko Haram. Tuzakenera amaraso mashya y’abo mu majyaruguru y’iburasirazuba azigishwa kugira ngo tuzemeze ko twatsinze Boko Haram.”
Boko Haram ni umutwe washinzwe mu 2002 na Mohamed Yusuf. Hari ku butegetsi Obasanjo wakurikiwe n’abakuru b’igihugu batatu: Umaru Musa Yar’Adua, Goodluck Jonathan na Muhammadu Buhari uriho uyoboye Nigeria ubu.
