Minisitiri w’Intebe w’u Bwongereza, Boris Johnson, kuri uyu wa 24 Kanama 2022 yasubiye mu murwa mukuru wa Ukraine, Kyiv, mu buryo butunguranye.
Uyu muyobozi amaze gutangariza kuri Twitter ati: “Ibibera muri Ukraine biratureba twese. Ni yo mpamvu ndi muri Kyiv uyu munsi. Ni yo mpamvu UK izakomeza gushyigikira inshuti zacu zo muri Ukraine. Nizera ko Ukraine ishobora kandi izatsinda iyi ntambara.”
Boris yahuye na Perezida wa Ukraine, Volodymyr Zelensky, batemberana mu murwa mukuru w’igihugu barindiwe umutekano mu buryo bukomeye.
Ageze muri Ukraine mu gihe kuri uyu wa 24 Kanama iki gihugu kimaze amezi 6 mu ntambara n’u Burusiya cyizihiza ku nshuro ya 31 umunsi mukuru w’ubwigenge.
Kuva intambara yo muri Ukraine yatangira tariki ya 24 Gashyantare, Boris agiriye inzinduko eshatu muri Kyiv, zose zatunguranye. Urwa mbere yarugiriyeyo ku ya 9 Mata, urwa kabiri arugirirayo ku ya 17 Kamena.
