Guhera ku wa Gatandatu tariki ya 25 Gashyantare 2017, Perezida w’ishyirahamwe ry’umupira w’amaguru ku isi (FIFA), Bwana Gianni Infantino, yari mu ruzinduko rw’akazi mu Rwanda.
Mbere yo gusoza uruzinduko kuri iki Cyumweru tariki ya 26 Gashyantare 2017, nibwo yasuye urwibutso rwa Jenoside rwa Kigali ruherere ku Gisozi yunamira inzirakarengane z’Abatutsi zazize Jenoside.
Urwibutso rwa Jenoside rwa Kigali, Gianni Infantino, yasuye rushyinguyemo imibiri y’inzirakarengane z’Abatutsi igera ku bihumbi 25 bishwe muri jenoside y’1994 mu Rwanda .
[xyz-ihs snippet=”google-pub”]
Bwana Gianni Infantino yanabonanye na Perezida wa Repubulika, Paul Kagame i Gabiro mu karere ka Gatsibo, Intara y’Iburasirazuba baganira ku iterambere ry’umupira w’amaguru.
Infantino yashimiye Perezida Kagame ku bw’imbaraga akoresha mu guteza imbere umupira w’amaguru mu Rwanda ndetse no muri Afurika y’Iburasirazuba.
Bwana Infantino yijeje ko FIFA izakomeza gufasha u Rwanda mu bikorwa byo guteza imbere ruhago ndetse anashimira abayobozi b’igihugu.
Ati: “FIFA izakomeza gufasha u Rwanda mu mishinga yarwo yo kugeza ruhago ku rundi rwego, ndashimira ubuyobozi bw’u Rwanda mu guteza imbere siporo”.
Uyu muyobozi yakomeje avuga ko u Rwanda rufite ubushake n’imbara byo kuba igihugu gikomeye mu bya siporo. Perezida Kagame nawe akaba yijeje uyu muyobozi kutazasubiza inyuma amarushanwa cyangwa ibindi bikorwa bijyanye n’umupira w’amaguru bazaba bifuza ko bikorerwa mu Rwanda.
Igikorwa cyari cyazanye uyu muyobozi wa FIFA mu Rwanda ni icyo kubaka Hotel y’ishyirahamwe ry’umupira w’amaguru mu Rwanda (FERWAFA). Perezida Kagame yamwijeje ko Leta y’u Rwanda izakomeza gutanga ubufasha muri iki gikorwa. FIFA ikaba yaratanze inkunga ya 65% by’ibizakenerwa ngo yubakwe.
Kanda hano ujye ubona amakuru yihuse kandi kugihe kuri Facebook no kuri twitter
Itangishatse Theoneste/Bwiza.com
