Amerika yemeye kugurisha kuri Taiwan intwaro zifite agaciro ka miliyari 1.1 z’amadolari, bituma Ubushinwa burakarara buvuga ko buzafata ingamba zo kwihimura. Aya masezerano ateganyijwe yo kugurisha intwaro arimo ubwirinzi bwa radar bwo kugenzura ibitero by’indege byerekeza muri Taiwan hamwe n’ibisasu bya misile bisenya amato n’ibisenya indege. Ambasade y’Ubushinwa i Washington yasabye Amerika kuburizamo ayo masezerano yo kugurisha intwaro, bitaba ibyo igahura n'”ingamba zo kwihimura”. Umuvugizi w’iyo ambasade, Liu Pengyu, yavuze ko ayo masezerano “abangamiye bikomeye” umubano hagati ya Washington na Beijing nk’uko REUTERS, BBC, ALJAZEERA n’ibinyamakuru bimwe byo muri Taiwan bibigarukaho. Yongeyeho ati: “Ubushinwa buzafata ingamba zo kwihimura zihamye kandi zemewe n’amategeko ndetse za ngombwa bijyanye n’ibi bishya bibaye ku kuntu ibintu [bisanzwe] bimeze”. Ubushinwa bubona iki kirwa gifite ubutegetsi bwacyo, nk’igice cy’ubutaka bwabwo, kandi bushimangira ko iki kirwa gikwiye guhuzwa n’ubutaka busanzwe bw’Ubushinwa, no ku ngufu bibaye ngombwa. Ubushinwa na Amerika ntibivuga rumwe uburyo Taiwan yafatwa. Amerika komeje kwerekana ko ishyigikiye Taiwan, ingingo irakaza bikomeye Ubushinwa. Bibaye nyuma yuko umukuru w’inteko ishingamategeko y’Amerika, umutwe w’abadepite, Nancy Pelosi, mu kwezi gushize abaye umutegetsi wa mbere wo ku rwego rwo hejuru cyane wo muri Amerika usuye Taiwan mu myaka 25 ishize.
