Minisitiri w’Intebe w’u Bubiligi, Alexander De Croo, yatangarije abitabiriye Inteko Rusange y’Umuryango w’Abibumbye i New York ko misiyo y’amahoro yawo muri Repubulika ya Demukarasi ya Congo, MONUSCO, isimbuzwa indi.
De Croo ku wa 21 Nzeri 2022, mu ijambo yagejeje ku banyacyubahiro bari bateraniye muri iyi nteko yagize ati: “Ubutumwa bwacu burasobanutse: MONUSCO ikwiye kurangira, igasimburwa n’ikindi kintu.”
Uyu muyobozi yasobanuye ko ubundi misiyo yakabaye irinda umutekano w’abaturage, igashyira ku iherezo intambara z’abitwaje intwaro, ariko ngo kuri MONUSCO si ko byagenze.
Yagize ati: “Misiyo ikwiye kurinda Abanyekongo kandi ikarangiza intambara z’abitwaje intwaro, kandi MONUSCO ntifite ibikorwaremezo, na manda yayo ntiyemerera kubikora.”
Ijambo rya De Croo uherutse kugirira uruzinduko mu burasirazuba bwa RDC rishimangira ubusabe bwa bamwe mu banyapolitiki bo muri iki gihugu n’abaturage, bakoze imyigaragambyo, bagaragaza ko MONUSCO igomba kugenda.
Intandaro y’iyi myigaragambyo yabereye mu mijyi itandukanye yo mu burasirazuba bw’igihugu ni ibikorwa by’umutwe witwaje intwaro wa M23 umaze amezi atatu ufashe umujyi wa Bunagana, ku mupaka wa RDC na Uganda.
