Perezida Félix Antoine Tshisekedi wa Repubulika Iharanira Demokarasi ya Congo usanzwe ari n’Umugaba w’Ikirenga w’Ingabo z’iki gihugu, yakoze impinduka mu buyobozi bukuru bwazo, anashyiraho Umugaba Mukuru w’Ingabo mushya.
Uwo Tshisekedi yagize Umugaba Mukuru w’Ingabo za Congo Kinshasa ni Lt. Gen Christian Tshiwewe; nyuma yo kumuzamura mu ntera amuvanye ku ipeti rya Général Major.
Tshiwewe wari usanzwe akuriye umutwe w’abasirikare bashinzwe kurinda Perezida Tshisekedi, yasimbuye kuri uriya mwanya Gén Celéstin Mbala Munsense wari Umugaba Mukuru wa FARDC kuva muri Nyakanga 2018.
Ku wa Mbere tariki ya 03 Ukwakira ni bwo Tshisekedi yamusimbuje Tshiwewe, nk’uko bigaragarira mu iteka ryasomewe kuri Televiziyo y’Igihugu na Tina Salama usanzwe ari Umuvugizi wa Perezida wa Congo Kinshasa.
Lt Gen Tshiwewe agomba kungirizwa na Gén. Maj ISHALI Gonza nk’Umugaba Mukuru wungirije ushinzwe ibikorwa n’ubutasi cyo kimwe na Gén. Maj KASONGA TSHIBANGU Leon-Richard wari usanzwe ari Umuvugizi wa FARDC wagizwe Umugaba Mukuru wungirije ushinzwe imiyoborere n’ibikoresho.
Tshiwewe yahise asimburwa na Gén. Maj Kabi Kiriza Ephraim ku mwanya wo kuyobora abasirikare bashinzwe kurinda Perezida Félix Tshisekedi. Uyu agomba kungirizwa na Général de brigade Erickson Inyengeli Bakati uzaba ari n’Umuyobozi wungirije ushinzwe ibikorwa n’ubutasi muri uriya mutwe.
Mu zindi mpinduka Gen-Major Jérôme Shiko Tambwe yagizwe Umuyobozi ushinzwe ibikorwa muri FARDC, Gén-Major Christian Ndaywel agirwa ukuriye ubutasi bwa Gisirikare, Gén Major Thomas Kisezo agirwa ushinzwe imiyoborere na ho Gen-Major Kukuabo Bora agirwa ushinzwe ibikoresho.
Ni mu gihe Général-Major Jules Banza Muilambwe yagizwe ushinzwe ibya gisirikare mu biro bya Tshisekedi, by’umwihariko ibikorwa n’ubutasi.
Lt Gen Christian Tshiwewe w’imyaka 51 y’amavuko, yavukiye i Lubumbashi ho mu ntara ya Haut-Katanga y’ubu, akaba umwe mu basirikare b’abizerwa ndetse n’inkoramutima za Perezida Félix Tshisekedi.
Uyu mugabo ushimagizwa na bagenzi be nk’umwe mu basirikare bakora kinyamwuga kandi banarangwa n’ikinyabupfura kinshi, mu 1998 ubwo yari afite imyaka 30 y’amavuko ni bwo yarangije muri promotion ya mbere y’Abofisiye barangirije amasomo muri Sudani mu gihe urugamba rwari rurimbanyije hagati y’inyeshyamba zari ziyobowe na Laurent-Désiré Kabila n’Ingabo z’uwari Perezida, Mobutu Sese Seko.
Hagati ya 1999 na 2000 bwo yerekeje muri Angola kwiga amasomo ya État Major, mbere yo kugaruka muri Congo Kinshasa.
Gen Tshiwewe yongeye gusubira ku ntebe y’ishuri hagati ya 2003 na 2004 kwiga amasomo amutegurira kuba Umuyobozi wa Brigade, nyuma aza kwitabira imyitozo ijyanye no kurwanya iterabwoba we na bamwe muri bagenzi be bahabwaga n’Ingabo za Israel.
Mu mirimo yakoze harimo kuba Umuyobozi wa Brigade ya 10 y’Ingabo za Congo ikorera i Mura mu mujyi wa Kinshasa yayoboye mu 2003; mbere yo kugirwa umuyobozi wa régiment ya 13 igizwe n’abasirikare barinda Umukuru w’Igihugu ikorera i Lubumbashi. Iyi régiment yayibereye umuyobozi kuva mu 2007 kugeza muri 2011.
Nyuma yo kugaruka i Kinshasa, Tshiwewe yagizwe Umuyobozi wungirije ushinzwe ibikorwa n’ubutasi mu mutwe w’abasirikare bashinzwe kurinda Umukuru w’Igihugu, inshingano yakoze kuva muri 2014 kugeza mu 2020 ubwo Tshisekedi yamuzamuraga mu ntera akamugira Général Major.
Uyu mugabo yagizwe Umugaba Mukuru w’Ingabo za Congo Kinshasa mu gihe iki gihugu kimaze igihe cyugarijwe cyane n’umutekano muke ushingiye ku mitwe yitwaje intwaro isa n’iyigaruriye Uburasirazuba bwa kiriya gihugu.
Ni imitwe irimo n’uwa M23 umaze amezi akabakaba ane warigaruriye Umujyi wa Bunagana uri ku mupaka wa Congo Kinshasa na Uganda.
Leta y’i Kinshasa ishinja u Rwanda kuba ari rwo ruri inyuma ya M23, ibyo Leta yarwo itahwemye kugaragaza ko bitari ukuri.
Ibi bivuze ko Tshiwewe nk’Umugaba Mukuru w’Ingabo za Congo Kinshasa mu kazi kamutegereje harimo guca intege imitwe yose ikorera mu Burasirazuba bw’Igihugu irimo na M23.
Mu minsi ishize uyu mugabo n’abasirikare yari ayoboye bagaragaye mu mihanda y’i Kinshasa basaba Perezida Tshisekedi kubaha intwaro, ngo ubundi bakaza gutera u Rwanda mu rwego rwo kurangiza ikibazo cya M23.
