U Burundi bwohereje izindi ngabo mu burasirazuba bwa RDC

Leta y’u Burundi yohereje izindi ngabo mu burasirazuba bwa Repubulika ya Demukarasi ya Congo (RDC) kuri uyu wa 5 Ukwakira 2022 kugira ngo zihangane n’imitwe yitwaje intwaro ihakorera.

Mbere y’uko zoherezwa nk’uko urubuga SOS Medias rubivuga, Umunyamabanga uhoraho mu kanama k’igihugu gashinzwe umutekano, Colonel Nzisabira Pierre Claver yari yaraye asobanuriye abitabiriye inama y’umutekano ko zirajya mu butumwa bw’umuryango wa Afurika y’iburasirazuba, EAC.

Yagize ati: “Turagira amatsinda abiri y’ingabo muri Congo. Irya mbere rikorana na Congo hashingiwe ku bufatanye bw’ibihugu byombi. Irya kabiri rizoherezwa ejo mu butumwa bwa EAC. Aya matsinda yombi azakorana hagamijwe kugarura amahoro mu burasirazuba bwa RDC.”

Itsinda rya mbere ryoherejwe mu ntara ya Kivu y’Amajyepfo tariki ya 15 Kanama 2022. Bivugwa ko rigizwe n’abasirikare babarirwa muri 600. Ibikorwa byaryo byo kurwanya imitwe yitwaje intwaro ihakorera birarimbanyije.