Perezida Félix Antoine Tshisekedi Tshilombo wa Repubulika Iharanira Demokarasi ya Congo, yongeye gukora impinduka mu gisirikare cy’iki gihugu (FARDC) zasize ashyizeho umuvugizi mushya.
Izi mpinduka zije zikurikira izo aheruka gukora mu minsi mike ishize zasize ashyizeho Umugaba Mukuru w’Ingabo (Lt Gen Christian Tshiwewe) ndetse n’Abagaba bakuru b’Ingabo bamwungirije.
Impinduka Perezida Tshisekedi yakoze zasize Général Major Syilvain Ekenge wari usanzwe ari Umuvugizi wa Guverineri w’Intara ya Kivu y’Amajyaruguru ku rwego rwa gisirikare abaye Umuvugizi w’Igisirikare cya Congo Kinshasa.
Ekenge yasimbuye kuri uyu mwanya Général-Major Léon Kasonga Tshibangu uheruka kugirwa Umugaba Mukuru wungirije wa FARDC ushinzwe ubutegetsi n’ibikoresho.
Tshisekedi kandi yagize Général de Brigade John Tshibangu umuyobozi w’akarere ka gisirikare ka 21 kabarizwamo Ingabo za Congo Kinshasa zikorera mu ntara ya Kasai y’Iburasirazuba.
Uyu wigeze gufungwa ku butegetsi bwa Joseph Kabila yasimbuye kuri izi nshingano Général-Major Marcel Mbangu Mashita.
