Polisi ya Norvège yataye muri yombi Umunyarwanda Gasana François, ukekwaho uruhare muri Jenoside yakorewe Abatutsi mu 1994. Ikinyamakuru newsaf.cgtn.com dukesha aya makuru kivuga ko ibi byabaye kuwa Gatatu ubu uyu mugabo uri mu myaka 40 akaba afunzwe. Kivuga ko Urwego rushinzwe iperereza ku byaha muri Polisi ya Norvège, Kripos, rwatangaje ko rwakoze amaperereza menshi abanziriza koherewa iwabo mbere yo kumuta muri yombi. Uyu mugabo yafatiwe mu murwa mukuru wa Noruveje, Oslo, nyuma y’uko ubuyobozi bw’iki gihugu butangaje ko ari icyifuzo cyari cyatanzwe ko yafatwa. Umuvugizi w’Ikigo cy’igihugu gishinzwe iperereza ku byaha byibasira inyokomuntu muri Noruveje, Thea Elise Kjaerras, yavuze ko bakoze amaperereza menshi afitanye isano n’ubusabe bwo guta uyu mugabo muri yombi, yongeraho ko hakiri kare kuba hatangazwa icyayavuyemo. Bityo, avuga ko nta byinshi ashobora kuvuga. Kugeza ubu n’ubwo byatangajwe ko uyu mugabo yatawe muri yombi ariko, ntawe uzi igihe yafatiwe, kandi n’amazina ye ntiyatangajwe cyangwa ngo havugwe icyaha nyirizina yakoze. Hategerejwe ko hanozwa ibisabwa ngo uyu mugabo yoherezwe mu Rwanda.
