Abagabo batandatu; bakuriwe na ‘jenerali’ Leopold Mujyambere hamwe na ‘colonel’ Joseph Habyarimana alias Sophonie Macebo, bahoze mu mutwe w’inyeshyamba wa FDLR bagejejwe mu rukiko i Nyanza biregura ku byaha baregwa, gusa urukiko rusanga abunganizi babo bakwiye gucibwa amande ya Frw 200,000. Bahawe umwanya, abaregwa bavuze ko bamaze amezi abiri batabonana n’abunganizi babo mu mategeko, basaba urukiko gusubika urubanza bagahabwa igihe cyo kubonana nabo. Abunganizi babo basobanuye ko gereza ya Kigali y’i Mageragere itabahaye inyandiko z’urubanza kugira ngo bashobora kuziganiraho n’abakiliya babo ndetse ko itaborohereje kubonana nabo nk’uko BBC yabitangaje. Abunganizi babo basobanuye ko gereza ya Kigali y’i Mageragere itabahaye inyandiko z’urubanza kugira ngo bashobora kuziganiraho n’abakiliya babo ndetse ko itaborohereje kubonana nabo. Aba banyamategeko bavuze ko nta n’ubushobozi bafite bwo gusohora izo nyandiko (Printing) kuko ari nyinshi cyane, ko basabye ubufasha Urugaga rw’abavoka, bakaba babutegereje. Ubushinjacyaha bwavuze ko ibivugwa n’aba bunganizi ari ugutinza urubanza kuko inyandiko z’urubanza ziri muri ‘system’ y’ikoranabuhanga y’urukiko ababuranyi bose bahuriraho. Nyuma yo kumva impande zose, Urukiko rwavuze ko ibyo aba bunganizi bavuga nta shigniro bifite ‘kuko bahawe umwanya uhagije’ wo gutegura kwiregura kw’abakiriya babo. Urukiko rwavuze ko bagize ubushake bucye, rubahanisha gutanga amande y’ibihumbi magana abiri y’u Rwanda (200,000Frw) kandi ko batemerewe kugira urundi rubanza bajyamo batarayatanga. Abaregwa bakurikiranyweho ibyaha byo; kurema umutwe w’ingabo utemewe, kuba mu mutwe w’iterabwoba n’ ubugambanyi. Bo bahakana ibi byaha baregwa bishingiye ku bitero FDLR yagabye ku Rwanda. Urubanza rw’abaregwa rwimuriwe itariki 29 Ugushyingo 2022.
