Perezida wa Leta zunze ubumwe za Amerika,Donald Trump yongeye kwibasira uwo yasimbuye, Barack Obama ku rubuga rwa Twitter amushinja kurekura imfungwa 122 zari zifungiye muri Gereza ya Guantanamo ubu bakaba ngo barasubiye kurwana.
Trump ntavuga aho yakuye ayo makuru, nubwo izo mfungwa zivugwa muri raporo y’Ibiro by’iperereza igaragaza ko mu mfungwa 693 barekuwe muri gereza ya Guatanamo 122 muri bo basubiye mu gukora ibikorwa bifite aho bihuriye n’iterabwoba.
Nubwo Perezida Trump yemeza ko 122 bose barekuwe na Obama, amakuru nyayo avuga ko muri abo 122 icyenda gusa aribo barekuwe n’ubutegetsi bwa Obama. Abandi barekuwe ku butegetsi bwa George W. Bush.
Bibaye ubwa Kabiri mu gihe kitarenze icyumweru Trump yibasira uwo yasimbuye, Barack Obama.
[xyz-ihs snippet=”google-pub”]
Trump yashinje Obama gushira ibyuma bifata amajwi mu byahoze ari ibiro bye I New York mbere yuko amatora y’umukuru w’igihugu aba mu mpera z’umwaka ushize.
Ibi Trump yabivugiye mu butumwa yacishije ku rubuga rwe rwa Twitter. Abigereranya n’amakosa yatumye Richard Nixon yegura ku mwanya w’umukuru w’igihugu mu mwaka w’1974.
Muri ubwo butumwa nta bimenyetso Perezida Trump yigeze agaragaza bihamya ibyo arega Obama.
Ibiro bya Obama byahise bisohora itangazo ry’amagana ibyavuzwe na Trump nk’uko bitangazwa n’Ijwi ry’Amerika .
Kanda hano ujye ubona amakuru yihuse kandi kugihe kuri Facebook no kuri twitter
Gabriel Habineza@Bwiza.com
