Umutoza w’Ikipe y’Igihugu y’u Burundi ‘Intamba mu Rugamba’, Jimmy Ndayizeye, yahamagaye urutonde rw’abakinnyi 22 bagomba kwitegura umukino wa gicuti ifitanye na Côte d’Ivoire barimo myugariro Ndizeye Samuel wa Rayon Sports.
Uyu musore usanzwe ari Visi-Kapiteni wa Rayon Sports yahamagawe n’u Burundi, mu gihe mu minsi ishize yahamagawe n’Ikipe y’igihugu ‘Amavubi’ gusa akaza kubura ibyangombwa byo kuyikinira kuko yari yarigeze gukinira ingimbi z’u Burundi.
Umutoza Carlos Ferrer w’Amavubi yari yahamagaye Ndizeye Samuel mu bakinnyi bagombaga kwitegura imikino ya gicuti Amavubi yakinnye muri Nzeri uyu mwaka, irimo uwo yanganyijemo na Guinée-Equatoriale 0-0 ndetse n’uwo yatsinzwemo na St Eloi Lupopo ibitego 3-1.
Ndizeye Samuel wamaze guhamagarwa n’Intamba mu Rugamba yavukiye mu gihugu cy’u Burundi, gusa ku babyeyi b’Abanyarwanda ari naho yakuriye.
Ni umukinnyi wa Rayon Sports kuva muri 2019, nyuma yo kuyigeramo avuye muri Vital’o. Biteganyijwe ko we na bagenzi be bagomba kwipima n’Inzovu za Côte d’Ivoire ku wa 26 Ugushyingo, mu mukino uzabera muri Maroc.
Urutonde rw’abakinnyi 22 umutoza Jimmy Ndayizeye yahamagaye
