Liverpool yahawe andi mahirwe yo kwihorera kuri Real Madrid, Man United yisanga na Barça muri Europa

Tombora y’uko amakipe agomba guhura muri ? cy’irangiza cya UEFA Champions league, yasize ikipe ya Real Madrid yo muri Espagne itomboye Liverpool yo mu Bwongereza.

Ni amakipe yombi agiye kongera guhura mu gihe muri Gicurasi uyu mwaka yahuriye ku mukino wa nyuma wasize Real Madrid itwaye igikombe, nyuma yo gutsinda Liverpool igitego 1-0.

Ni igitego cyatsinzwe n’umunya-Brésil Vinicius Junior.

Kuri iyi nshuro ni umwanya mwiza Liverpool yongeye kubona wo kwihorera kuri Real Madrid, nyuma y’uko muri 2018 iyi kipe na bwo yayitwaye igikombe nyuma yo kuyitsinda ibitego 3-1.

Usibye uyu mukino, undi watumye abantu bacika ururondogoro ni uwa PSG yo mu Bufaransa igomba kwisobanura na Bayern Munich yo mu Budage.

Aya makipe yombi muri 2020 yahuriye ku mukino wa nyuma wa Champions league wasize Bayern itwaye igikombe nyuma yo gutsinda PSG igitego 1-0, mbere y’uko mu mwaka wakurikiyeho PSG iyihoreraho ikayisezerera muri ¼ cy’irangiza.

Uko tombora yose yagenze

RB Leipzig vs Man City
Club Brugge vs Benfica
Liverpool vs Real Madrid
AC Milan vs Tottenham
Eintracht Frankfurt vs Napoli
Borussia Dortmund vs Chelsea
Inter Milan vs Porto
PSG vs Bayern Munich

Muri Europa league Manchester United yisanze na FC Barcelona

Uretse tombora ya Champions league, kuri uyu wa Mbere hanabaye tombora ya UEFA Europa league.

Umukino wa kamarampaka waziye imburagihe ni ugomba guhuza FC Barcelona yo muri Espagne na Manchester United yo mu Bwongereza.

Ni amakipe yombi y’ubukombe kuko muri 2009 na 2011 yahuriye ku mukino wa nyuma wa UEFA Champions gusa bikarangira Barcelona ari yo itwaye ibikombe byombi.

Kuri iyi nshuro amakipe yombi agiye guhura mu gihe afite abakinnyi bakomeye barangajwe imbere na Robert Lewandowski ku ruhande rwa Barça na Cristiano Ronaldo ku rwa Manchester United.

Uko tombora yose ya Europa league yagenze

Barcelona vs Man Utd
Juventus vs Nantes
Sporting Lisbon vs FC Midtjylland
Shakhtar Donetsk vs Rennes
Ajax vs Union Berlin
Bayer Leverkusen vs Monaco
Sevilla vs PSV
RB Salzburg vs Roma