Ikipe y’Igihugu ya Argentine ‘La Albiceleste’ yatangiye nabi imikino y’Igikombe cy’Isi cya 2022 kiri kubera muri Qatar, nyuma yo gutsindwa na Arabie Saoudite ibitego 2-1.
Hari mu mukino wo mu tsinda C amakipe yombi yari yahuriyemo kuri Stade ya Lusail kuri uyu wa Kabiri.
Argentine nk’imwe mu makipe yaje ahabwa amahirwe yo kwegukana Igikombe cy’Isi cy’uyu mwaka, yahabwaga amahirwe menshi yo gutsinda Arabie Saoudite muri uyu mukino.
Uretse kuba iyi kipe ifite abakinnyi b’amazina manini nka Lionel Messi, Angel Di Maria, Lautaro Martinez n’abandi; yaje mu gikombe cy’Isi ari yo kipe y’igihugu yari ifite agahigo ko kumara imikino myinshi idatsindwa kuko yari imaze 36 yikurikiranya.
Byasabye umunota wa 10 wonyine w’umukino ngo Lionel Messi afungirire amazamu ikipe y’igihugu cye kuri Penaliti, nyuma y’ikosa ryari rimaze gukorerwa kuri Leandro Paredes.
Argentine yakomeje kuyobora umukino, ndetse mbere y’uko igice cya mbere cy’umukino kirangira yatsinze ibitego bitatu (kimwe cya Messi na bibiri bya Lautaro Martinez) byose byanzwe kuko habaga habayeho kurarira.
Arabie Saoudite itaremye uburyo bwinshi bw’ibitego mu buryo busa nk’ubwatunguranye yishyuye igitego yari yatsinzwe ku munota wa 47 w’umukino biciye kuri Saleh Al-Shehri, ku mupira yateranye myugariro Christian Romero uruhukira mu nshundura.
Iyi kipe y’umutoza HervĂ© Renard yatsinze igitego cya kabiri ku munota wa 53 w’umukino biciye kuri Salem Al-Dawsari, ku mupira ukomeye yatereye hafi y’urubuga rw’amahina mbere yo kuruhukira mu nguni y’izamu rya Emiliano Martinez.
Ibi bitego byombi byatumye umutoza Lionel Scaloni akora impinduka eshatu zihuse zasize Christian Romero, Leandro Paredes na Papu Gomes bahaye umwanya Lisandro Martinez, Julian Arvalez na Enzo Fernándes.
Iminota myinshi y’igice cya kabiri cy’umukino abanya-Argentine bayimaze no kurwana n’uko byibura bakwishyura igitego cya kabiri bari batsinzwe; gusa uburyo bw’ibitego bukomeye bubarirwa muri butanu babonye bananirwa kububyaza umusaruro.
Argentine yaherukaga gutsindwa umukino wa mbere w’itsinda mu gikombe cy’Isi cyo mu 1990 biteganyijwe ko mu mukino wa kabiri w’itsinda igomba guhura na Pologne; mu gihe Arabie Saoudite izakina na Mexique.
