Ikipe ya APR FC yanganyije na Kiyovu Sports ibitego 2-2, mu mukino wa shampiyona amakipe yombi yari yahuriyemo ku mugoroba wo kuri uyu wa Gatatu.
Iyi kipe y’Ingabo z’Igihugu yari yakiriye Kiyovu Sports kuri Stade ya Kigali i Nyamirambo, mu mukino w’umunsi wa 10 wa shampiyona.
Ni umukino watangiye ishyira igitutu cyinshi kuri Kiyovu Sports, ndetse ku munota wa kabiri wonyine irema uburyo bukomeye biciye kuri Byiringiro Lague, Niyomugabo Claude na Mugunga Yves; gusa biba ngombwa ko umusifuzi yemeza ko hari habayeho kurarira.
Byasabye umunota wa 13 w’umukino ngo APR FC ifungure amazamu biciye kuri Mugisha Bonheur ‘Casemiro’. Hari ku mupira wa koruneri yari itewe na Ramadhan Niyibizi; mbere y’uko Bonheur awutereka mu izamu n’umutwe.
Iki gitego cyaje gikurikira ubundi buryo buremereye APR FC yari imaze kubona, ubwo Byiringiro Lague yacomekeraga umupira Ruboneka Jean Bosco gusa bikaba ngombwa ko umunyezamu Nzeyurwanda Djihad awumutanga akawushyira muri koruneri.
Igitego cya kabiri cya APR FC kinjiye ku munota wa 21 w’umukino gitsinzwe na Byiringiro Lague. Hari ku mupira yari yambuye Nsabimana Aimable awinjirana mu rubuga rw’amahina, acenga myugariro Ndayishimiye Thierry mbere yo kuwutera mu nguni y’izamu rya Djihad.
Nta buryo buremereye Kiyovu Sports yigeze ibona mu minota 45 y’umukino, kuko imipira y’imiterekano yakavuyemo ibitego imyinshi Nshimirimana Ismael ‘Pitchou’ yayiteraga hanze y’izamu rya Ishimwe Pierre.
Bitandukanye n’igice cya mbere cy’umukino, igice cya kabiri cyatangiranye n’igitutu cyinshi ikipe ya Kiyovu Sports yokeje APR FC, ibyanatumye iyi kipe yo ku Mumena igombora kimwe mu bitego yari yatsinze ibifashijwemo na Mugenzi Bienvenu.
Ni igitego uyu rutahizamu yatsinze nyuma ya Coup-Franc yari itewe na Ryad Nordien wari umaze kwinjira mu kibuga asimbura Bizimana Amissi ‘Coutinho’.
Igitego cya Mugenzi cyaje gikurikira uburyo bubiri bw’ibitego Kiyovu Sports yari imaze guhusha, burimo ubwo ku munota wa 46 w’umukino uyu musore yateye hanze y’izamu ndetse n’ubwa Bigirimana Abedi wateye umupira ku munota wa 48 ugafatwa na Ishimwe Pierre.
Uburyo bukomeye APR FC yabonye mu gice cya kabiri cy’umukino bwaje ku munota wa 64, ubwo Ruboneka yarekuraga ishoti rikomeye ryagenderaga hasi, gusa umupira ukurwamo n’umunyezamu Djihad.
Kiyovu Sports yishyuye ku munota wa 85 w’umukino nanone ibifashijwemo na Bienvenu Mugenzi, ku mupira watewe na Nordien akozaho ikirenge mbere yo kuruhukira mu izamu rya Ishimwe Pierre.
Kunganya uyu mukino byatumye Kiyovu Sports ikomeza kuyobora shampiyona by’agateganyo n’amanota 21, irusha APR FC ya gatatu amanota atatu.
