Ingabo z’u Rwanda ziri mu butumwa bwa Loni bwo kubungabunga amahoro muri Repubulika ya Centrafrique (MINUSCA), ku wa Gatanu zambitswe imidali y’ishimwe y’Umuryango w’Abibumbye.
Ni igikorwa cyabereye i Bangui ku cyicaro cya Batayo y’Ingabo z’u Rwanda izwi nka RWABATT10, kiri mu birindiro by’ahitwa Socatel M’Poko.
Intumwa idasanzwe y’Umunyamabanga Mukuru wa Loni, Valentine Rugwabiza wayoboye uyu muhango, yashimiye ingabo z’u Rwanda ku bwo kugarura amahoro n’icyizere mu baturage ba Centrafrique.
Ati: “Ndifuza gushimira mwese ku bwa serivisi n’akazi mwakoze mutizigama none bikaba bibahesheje imidali; ibi birerekana imikorere yanyu yo kuzuza inshingano zanyu.”
Umuyobozi wa RWABATT10, Col Emery Kayumba, yavuze ko kwambikwa imidali ari ikintu kidasanzwe mu mwuga wa gisirikare, bikaba bibatera akanyabugabo kadasanzwe mu kuzuza inshingano bahabwa na MINUSCA.
Ibirori byo kwambika imidali y’ishimwe nk’uko Igisirikare cy’u Rwanda cyabitangaje, byanitabiriwe n’abayobozi muri guverinoma ya Centrafrique, Olivier Kayumba uhagarariye u Rwanda muri Centrafrique, abahagarariye MINUSCA, abanyarwanda baba muri iki gihugu n’abandi.
