Kiyovu na Rayon Sports zikurikiranye ku myanya ya mbere ku rutonde rw’agateganyo rwa shampiyona y’icyiciro cya mbere mu Rwanda, zatsinzwe imikino y’uyu munsi, APR FC yongera kunganya.
Kiyovu Sports yakinnye na Gasogi United yayitesheje igikombe cya shampiyona mu mwaka w’imikino ushize, iyi kipe iyoborwa na Kakooza Nkuriza Charles uzwi nka KNC iyitsinda ibitego bitatu kuri kimwe (3-1).
Rayon yo yari yakiriwe na Musanze FC kuri Stade Ubworoherane iherereye mu mujyi wa Musanze, iyi kipe yari imaze iminsi ihigira kuyitsinda ibigeraho nk’uko yari yabyiyemeje. Ibitego bibiri byatumye iyi kipe yo mu majyaruguru yegukana amanota atatu.
APR FC yari yakiriwe na Mukura VS kuri sitade mpuzamahanga ya Huye mu majyepfo y’igihugu yacyuye inota rimwe, nyuma yo kurangiza umukino nta kipe yinjije indi igitego.
Iyi kipe y’ingabo inganyije mu mikino ibiri yikurikiranya, kuko mu wabanje yakinnyemo na Kiyovu Sports warangiye amakipe yombi atsindanye ibitego biri, buri yose icyura inota.
Uyu munsi urangiye Rayon Sports iyoboye urutonde n’amanota 22, Kiyovu iri ku mwanya wa kabiri n’amanota 21, APR FC iza ku mwanya wa gatatu n’amanota 19.
