RDC: Abarenga 100 bahitanwe n’imvura ikomeye yaguye i Kinshasa

Abantu barenga 100 ni bo byamaze kumenyekana ko bamaze guhitanwa n’imvura nyinshi yaguye i Kinshasa, mu murwa mukuru wa Repubulika Iharanira Demokarasi ya Congo.

Iyi mvura idasanzwe amakuru avuga ko yatangiye kugwa mu rucyerera rwo kuri uyu wa Kabiri tariki ya 13 Ukuboza 2022.

Byari mbere yo guteza inkangu ndetse n’imyuzure ikomeye mu ntara ya Kinshasa inasanzwe irimo umurwa mukuru wa Repubulika Iharanira Demokarasi ya Congo.

Amafoto n’amashusho yakwirakwiye ku mbuga nkoranyambaga yerekana inyubako nyinshi z’i Kinshasa zamaze kurengerwa n’amazi.

Imibare y’agateganyo yatangajwe na Radio Top Congo FM ku gicamunsi cyo kuri uyu wa Kabiri, ivuga ko abantu barenga 100 ari bo byamaze kumenyekana ko bamaze gupfa.

Usibye abapfuye, amakuru avuga ko hari n’ibikorwa remezo byiganjemo imihanda byasenyutse.

Muri byo harimo nk’umuhanda ‘Route Nationale no1’ uhuza umujyi wa Kinshasa n’uwa Matadi wo mu ntara ya Kongo yo hagati (Kongo-Central), wacikiyemo kabiri ahitwa Matadi Kibala ho muri Komini ya Mont-Ngafula.

Icikamo kabiri ry’uyu muhanda bivugwa ko ryagize ingaruka zikomeye ku mibereho, kuko nk’amakamyo yari yikoreye ibicuruzwa yabuze aho anyura.

Aka gace kandi kari mu twapfuyemo abantu benshi kuko kugeza ku gicamunsi kari kamaze kumenyekanamo abantu 10 bapfuye.

Ni nyuma ya Komine yitwa Selembao yabarurwagamo abantu 12 bapfuye ndetse n’agace kitwa Ngaliema kabaruwemo abantu umunani.