Argentine yageze ku mukino wa nyuma w’Igikombe cy’Isi inyagiye Croatie

Ikipe y’Igihugu ya Argentine ‘Albicelest’ yageze ku mukino wa nyuma w’Igikombe cy’Isi, nyuma yo gusezerera Croatie bari bahuriye muri ½ cy’irangiza ibitego 3-0.

Ni umukino amakipe yombi yari yahuriyemo kuri Stade ya Lusail kuri uyu wa Kabiri.

Lionel Messi ni we wafunguriye Argentine amazamu ku gitego yatsinze kuri Penaliti yo ku munota wa 34 w’umukino, nyuma y’ikosa rutahizamu Julian Arvalez yari amaze gukorerwaho mu rubuga rw’amahina n’umunyezamu Dominic Livakovic.

Byari mbere y’iminota itanu yonyine ngo Julian Arvalez atsindire Argentine igitego cya kabiri, nyuma yo kwinjirana umupira mu rubuga rw’amahina bikarangira awuteretse mu izamu.

Uyu rutahizamu wa Manchester City yashoboraga gutsinda igitego cya gatatu mu minota ya nyuma y’igice cya mbere cy’umukino; gusa umupira waturutse kuri koruneri yari itewe na Messi yateye n’umutwe uca hanze hanze gato y’izamu.

Igice cya mbere cy’umukino cyarangiye Argentine iri imbere n’ibitego 2-0.

Iyi kipe y’umutoza Lionel Scaloni yihariye igice cya kabiri cy’umukino, binarangira itsinze igitego cya gatatu.

Ni igitego cyatsinzwe na Alvarez ku munota wa 69 w’umukino, ku mupira mwiza yari ahawe na Messi wari wabanje gucenga ab’inyuma ba Croatie.

Argentine yageze ku mukino wa nyuma w’Igikombe cy’Isi ku nshuro yayo ya gatandatu mu mateka, izahurira n’Ikipe izarokoka hagati y’u Bufaransa na Maroc bazahurira muri ½ cy’irangiza kuri uyu wa Gatatu.