Umuganga akaba n’Umunyepolitiki wo muri Repubulika ya Demukarasi ya Congo, Dr Denis Mukwege, yatangaje ko yababajwe n’inkuru y’Umunyamulenge, Dr Kimararungu Merci, wishwe n’abarwanyi b’umutwe witwaje intwaro wa Mai Mai Bilozebishambuke.
Dr Kimararungu yiciwe ku bitaro bya Bijombo mu ntara ya Kivu y’Amajyaruguru tariki ya 25 Ukuboza 2022, mu gitero abarwanyi ba Mai Mai bagabye no ku bindi bitaro, bagakomeretsamo Abanyamulenge babiri.
Uyu muganga yishwe mu gihe yiteguraga gukora ubukwe, kuko yari amaze iminsi amenyesheje inshuti n’imiryango ko tariki ya 11 Werurwe 2022, azashakana n’umukunzi we witwa Gentille.
Dr Mukwege kuri uyu wa 27 Ukuboza 2022 yatangaje ko ababajwe n’urupfu rw’uyu muganga, ati: “Nababajwe n’urupfu rwa Doctor muri Kirungu, mu misozi miremire, tariki ya 25 Ukuboza. Ntibikwiye ko abo mu nzego z’ubuvuzi bibasirwa n’imitwe yitwaje intwaro muri RDC. Ubutabera bukwiye gukora akazi!”
Gusa ni ubutumwa butavuzweho rumwe bitewe n’uko Dr Mukwege ashinjwa kugirira urwango Abanyekongo bo mu bwoko bw’Abatutsi barimo Abanyamulenge.
Hari ababona ko Dr Mukwege yayobeje uburari, babishingira ku kuba uyu muganga ateruye ngo avuge amazina y’uyu muganga, nka Sugira Mireille wagize ati: “Umuganga yari afite izina n’umuryango, kandi uzi neza. Reka uburyarya bwawe.”
Moïse wiyise Twirwaneho yagize ati: “Amateka azagucira urubanza Denis Mukwege. Buri munsi Umunyamulenge aricwa cyangwa agatabwa muri yombi azira ubwoko, [bigakorerwa] mu mujyi utuyemo ariko ugahitamo guceceka. Twese tuzi ko uri inyuma y’iyi jenoside.”
Adele Kibasumba na we yanenze Dr Mukwege kuba atavuze izina ry’uwishe ndetse n’abamwishe. Ati: “Dr Kimararungu Merci afite izina n’isura imugira umuntu kandi uzwi. Hari abamwishe, ni Mai Mai yari ihagarikiwe na FARDC. Ni amakuru y’ingenzi cyane wasize inyuma Denis Mukwege. Iteka uvuga abakoze icyaha mu gihe bahaura n’umurongo wawe.”
Uwitwa Fidele Sebahizi abona ko igitutu Dr Mukwege yashyizweho n’abarimo Ludovic Kalengayi na Maisha RDC ari cyo cyatumye yamagana abishe Dr Kimararungu. Ati: “Hari ubwo igitutu gikora ibitangaza. Hashimwe Ludovic Kalengayi na MaishaRDC bashyize igitutu kuri Denis Mukwege kugira ngo avuge kuri uru rupfu.”
Dr Denis Mukwege asanzwe ari impirimbanyi y’uburenganzira bw’ikiremwamuntu, akaba yarashinze ibitaro bya Panzi mu mujyi wa Bukavu byita ku bagore bahohoterwa n’imitwe yitwaje intwaro. Akunze kwamagana abo ashinja guhungabanya umutekano muri RDC, ariko akavugwaho kubogama.
