Umusirikare wari mu bagize umutwe w’ingabo z’umuryango w’akarere ka Afurika y’Amajyepfo ukorera mu ntara ya Cabo Delgado muri Mozambique (SAMIM), ukomoka muri Botswana, yiyahuye.
Umuvugizi w’igisirikare cya Botswana, Colonel Magosi Moshagane, yatangaje ko uyu musirikare yiyahuriye mu gace Pemba ahagana saa tanu n’iminota 20 z’igitondo kuri uyu wa 9 Mutarama 2023.
Col. Moshagane yasobanuye ko yafashe icyemezo cyo kudatangaza amazina y’uyu musirikare kugira ngo “umuryango we umukorere ikiriyo mu buryo bwawo bwite muri ibi bihe bikomeye.”
Nk’uko itangazo ribika urupfu rw’uyu musirikare, riri ku rubuga rwa Minisiteri y’ingabo n’umutekano n’urw’igisirikare cya Botswana ribivuga, iperereza rigamije kumenya impamvu yatumye yiyahura rirakomeje.
Urupfu rw’uyu musirikare wa Botswana rukurikiye urwa mugenzi we wapfiriye muri Mueda tariki ya 9 Gashyantare 2022 na Lance Corporal Zikamee Kamai wiciwe mu mirwano bari bahanganyemo n’ibyihebe mu gace ka Nkonga, Cabo Delgado, tariki ya 29 Ugushyingo 2022.
