Ambasaderi wa Uganda muri Kenya no mu birwa bya Seychelles, Dr Hassan Galiwango, yapfuye azize uburwayi mu gitondo cy’uyu wa 16 Mutarama 2023.
Galiwango yapfiriye mu bitaro bikuru bya Nairobi muri Kenya, aho yivurizaga, nk’uko ibinyamakuru nka Daily Monitor bibisobanura.
Inkuru y’urupfu rw’uyu mudipolomate yemejwe n’abayobozi batandukanye barimo Umuyobozi w’inteko ishinga amategeko, Anita Annet Among, wanaboneyeho kwihanganisha umugore wa nyakwigendera usanzwe ari umudepite, Connie Galiwango.
Among yagize ati: “Ndihanganisha cyane umuvandimwe wanjye Hon. Connie Galiwango n’umuryango ku bw’urupfu rwa Dr Hassan Galiwango. Tuzahora twibuka imirimo ye ku gihugu.”
Uyu mudipolomate yagizwe Ambasaderi wa Uganda muri Kenya mu mwaka w’2020. Yakoze izindi nshingano zirimo uw’Umunyamabanga w’ishyaka riri ku butegetsi, NRM.
