Abagize ikipe ya Golden State Warriors, bakiriwe na Perezida Joe Biden muri Perezidansi ya Leta Zunze Ubumwe za Amerika, nyuma yo kwegukana Igikombe cya shampiyona ya Basketball muri Amerika (NBA) mu mwaka ushize wa 2022.
Ni bwo bwa mbere abagize iriya kipe bari basubiye muri White House, nyuma y’uko muri 2017 na 2018 bari banze kujyayo kubera gushwana n’uwari Perezida, Donald Trump.
Icyo gihe rurangiranwa Stephen Curry uri mu bakinnyi The Warriors igenderaho yumvikanye anenga cyane Trump, nyuma yo kwibasira kenshi abakinnyi b’abirabura.
Golden State nyuma yo kwanga kwitabira ubutumire bwo muri White House yari yahawe muri 2017, abayigize bahisemo kujya gutembera mu nzu ndangamurage igaragaza amateka n’umuco by’Abanyamerika bafite inkomoko muri Afurika.
Muri 2019 iyi kipe na bwo yatumiwe muri White House mu mugenzo wagombaga kuhabera, gusa abayigize aho kubwitabira bahitamo kubonana na Barack Obama wahoze ari Perezida wa Amerika.
Perezida Biden ubwo yakiraga Golden State Warriors muri White House kuri uyu wa Kabiri, yashimagije abayigize kubera kwitwara neza bidasanzwe mu myaka umunani ishize.
Ati: “Uyu munsi, Golden State Warriors izwi nk’imwe mu makipe yageze ku ntego zayo muri basketball na siporo muri rusange. Ibikombe bine bya NBA, no gukina imikino ya nyuma itandatu mu myaka umunani ishize ntabwo ari bibi basore.”
Perezida Biden yunzemo ko muri 2020 na 2021 ubwo The Warriors yananirwaga kugera mu mikino ya Playoffs hari abatekereje ko igihe cy’ubuhangange bwayo kirangiye, gusa ikaba yarongeye kugaruka.
Bitandukanye no ku ngoma ya Trump, ku bwe ngo iriya kipe “izahora yisanga muri White House”.
Muri Kamena 2022 ni bwo Golden State Warriors yatsinze Boston Celtics amanota 103-90, yegukana Igikombe cya kane cya NBA mu myaka umunani ishize.
Icyo gihe abakinnyi bayo batatu barimo Curry, Klay Thompson na Draymond Green bahise begukana Igikombe cya kane bari kumwe na yo ndetse n’umutoza Steve Kerr, nyuma yo gutwara NBA muri 2015, 2017 na 2018.
