Urukiko rw’ibanze rwa Kicukiro rwategetse ko Nkuranga Aimable wayoboye ihuriro ry’ibigo by’imari iciriritse AMIR afungurwa by’agateganyo, Bagire Eugène uvugwaho kuba nyir’ikigo cya BITSEC gicuruza ifaranga ry’ikoranabuhanga (cryptocurrency) gukomeza gufungwa by’agateganyo.
Ni umwanzuro wafashwe kuri uyu wa 20 Mutarama 2023 ku rubanza rw’ifungwa n’ifungurwa ry’agateganyo rwabaye tariki ya 17 Mutarama.
Nkuranga na Bagire bashinjwa ibyaha birimo kwihesha ikintu cy’undi hakoreshejwe uburiganya n’icy’iyezandonke bifitanye isano n’ifaranga ry’ikoranabuhanga ryakoreshwaga kuri BITSEC.
Nkuranga wahakanye ibi byaha, yasabye gufungurwa by’agateganyo, akazaburana adafunzwe, kuko ngo ntazatoroka ubutabera. Yasobanuye ko afite umuryango w’abana bane, ko afite abamwishingiye kandi ko afite ingwate y’ubutaka bungana na hegitari 7 buherereye mu karere ka Rulindo.
Bagire na we yasabye gufungurwa by’agateganyo, akazaburana mu mizi adafunzwe, asobanura ko atazatoroka ubutabera kuko afite imyirondoro ihagije kandi afite ingwate yatanga.
Urukiko rwasanze Nkuranga nta mpamvu zikomeye zatuma akekwaho icyaha cy’iyezandonke no kwihesha ikintu cy’undi hakoreshejwe uburiganya, afungurwa by’agateganyo, akazaburana mu mizi adafunzwe.
Rwasanze hari impamvu zikomeye zatuma Bagire akekwaho icyaha cyo kwihesha ikintu cy’undi hakoreshejwe uburiganya no kuba gihanishwa igifungo kiri hejuru y’imyaka 2, rutegeka ko afungwa by’agateganyo iminsi 30.
