Lionel Messi na Cristiano Ronaldo ni bo bayoboye abandi bakinnyi mu guhusha penaliti nyinshi mu kinyejana cya 21, aho Cristiano yahushije penaliti 29 naho Messi agahusha 32.
Nubwo bimeze bityo ariko, Cristiano ni we mukinnyi mwiza muri iki kinyejana iyo bigeze kuri penaliti kuko mu bitego 819 yatsinze muri rusange harimo ibya penaliti 146 nk’uko tubikesha ikinyamakuru ‘Goal’.
Cristiano akurikirwa na mukeba we w’ibihe byose Lionel Messi watsinze penaliti 108 ndetse n’umunyabigwi wa AS Roma n’ikipe y’igihugu y’ u Butaliyani, Francesco Totti watsinze penaliti 86, ibintu bishimangira ko ukora ari we ukosa.
Dore urutonde rw’abakinnyi 10 bahushije penaliti nyinshi muri iki kinyejana.
10. Sergio Agüero (12)
Umunyabigwi wa Manchester City Sergio Agüero, aherutse gusezera umupira w’amaguru burundu mu buryo butungurange mu mwaka wa 2021 kubera ikibazo cy’umutima. Agüero rero yahushije penaliti 12 muri 61 yahagazeho.
9. Frank Lampard (13)
Frank Lampard wakinnye hagati y’umwaka na 1995 na 2016, yahushije penaliti 13 muri 80 yateye muri rusange.
8. Ronaldinho (13)
Ronaldinho wari uzwiho kugira udushya twinshi, yakinnye hagati y’umwaka w’1998 na 2015. Ronaldinho yahushije penaliti 13 muri 68 yahagazeho.
7. Wayne Rooney (13)
Wayne Rooney wabaye umukinnyi ukomeye muri Manchester United n’ikipe y’igihugu y’u Bwongereza yahushije penaliti 13 muri 53 yateye.
6. Edinson Cavani (14)
Umukinnyi ukomoka mu gihugu cya Uruguay, Edinson Cavani azwi ku izina rya ‘El Matador’ bivuze indwanyi kabuhariwe kubera ishyaka ryamuranze. Cavani rero muri penaliti 73 yahawe, yahushijemo 14.
5. Antonio Di Natale (15)
Di Natale azwi cyane mu ikipe ya Udinese ndetse n’ikipe y’igihugu y’u Butaliyani. Kuva mu mwaka w’1996 atangiye gukina mu ikipe ya Empoli kugeza muri 2016 asoje inshingano ze nk’umukinnyi yahushije penaliti 15 muri 58 yateye.
4. Zlatan Ibrahimovic (16)
Guhera muri 1999 kugeza ubu Zlatan aracyabasha kuwutera ku myaka irenga 41 y’amavuko afite. Yahushije penaliti 16 muri 92 yateye.
3. Francesco Totti (19)
Umuntu wese warebye umupira hagati y’umwaka w’1992 na 2017 yakubwira ubuhanga budasanzwe bwa Totti by’umwihariko mu ikipe ya AS Roma n’ikipe y’igihugu y’u Butaliyani. Totti rero yahushije penaliti 19 muri 99 yatsinze.
2. Cristiano Ronaldo (29)
N’ubwo Cristiano ari we watsinze penaliti nyinshi muri iki kinyejana ndetse benshi bakaba bamwita ‘PENALDO’ kubera ubuhanga bwo kuzitera afite, muri penaliti 162 yabonye yahushijemo 29.
1. Lionel Messi (32)
Kuva muri 2004 Messi atangiye gukina nk’uwabigize umwuga kugeza ubu, muri penaliti 141 yateye yahushijemo 32.
