Umuryango Mahoro Peace Association (MPA) uharanira uburenganzira bw’Abanyamulenge wishimiye ko ingabo z’u Burundi ziri mu butumwa bw’amahoro bw’umuryango wa Afurika y’iburasirazuba muri Repubulika ya demukarasi ya Congo zatangiye kubarindira umutekano.
Uyu muryango usobanura ko mu mirwano y’ingabo za RDC zizwi nka FARDC n’uruhande zihanganye yabereye mu gace ka Bijombo tariki ya 17 Mutarama 2023, ingabo z’u Burundi ari bwo zarinze abasivili b’Abanyamulenge.
Uti: “Turashimira ingabo z’u Burundi zoherejwe mu misozi miremire, zarinze abasivili b’Abanyamulenge mu gihe cy’imirwano ya FARDC n’abo yari ihanganye na bo tariki ya 17/01 muri Bijombo.”
Umutwe urinda Abanyamulenge wa Twirwaneho na wo kuri uyu wa 22 Mutarama 2023, wemeje ko ingabo z’u Burundi zibarizwa mu mutwe wa EAC zoherejwe muri Uvira, Fizi na Itombwe, uboneraho gusaba ubufatanye mu kugarura amahoro mu ntara ya Kivu y’Amajyepfo.
MPA ishimiye ingabo z’u Burundi nyuma y’aho mu ntangiriro z’uku kwezi kwa Mutarama yari yagaragaje ko itewe impungenge n’imikoranire yazo n’iza RDC, mu gihe izi z’Abanyekongo zishinjwa kwifatanya n’imitwe yitwaje intwaro mu kugaba ibitero ku basivili b’Abanyamulenge.
Uyu muryango wagejeje izi mpungenge ku barimo Perezida w’u Burundi usanzwe ari n’Umuyobozi Mukuru w’umuryango wa Afurika y’iburasirazuba, Evariste Ndayishimiye.
