Abaririmbyi ba Chorale Betifague baratangaza ko kumenya amateka yaranze Genocide yakorewe Abatutsi muri Mata 1994, ari inzira nziza ibafashasha kubaka Itorerero ryabo ADEPR n’igihugu muri rusange, binyuze mu buhanzi.
Chorale Betifague ibarizwa muri Paruwasi ya ADEPR Cyahafi ku umudugudu wa Cyahafi. Ku cyumweru Tariki ya 26 Werurwe 2017, yasuye urwibutso rwa Kigali ku Gisozi baherekejwe n’abayobozi bakuru b’itorero barangajwe imbere n’umushumba mukuru w’Itorero rya Pantekote mu Rwanda (ADEPR ) Bishop Sibomana Jean.
Umuyobozi wa Chorale Betifague Nsengiyumva Valens bakimara gusura urwibutso atangaza ko bifuje gusura urwibutso ahanini bagamije ko buri muririmbyi amenya akanasobanurirwa amateka ya Genocide. Ni muri urwo rwego kandi babikoze kugirango barusheho gukomeza gufatanya n’itorero mu gutanga ubutumwa bwunga kandi bwubaka imitima n’igihugu biciye mu bihangano byabo.
Nsengiyumva agira ati ”Amateka ni ikintu gikomeye gishobora kuguha icyerekezo mu ubuzima bwawe, kuko akenshi usanga ubuzima bw’abatuye isi byanze bikunze bushingira ku mateka y’imiryango yabo, ibihugu byabo ndetse n’utuzi bakora. Ubuhanzi bushobora gutera imbere bushingiye kuri ibyo.Twe nka Chorale Betifague nitwubakira ku mateka y’igihugu cyacu nta kabuza tuzagera ku ntego, ariko cyane cyane izacu zishingira ku kunga abantu, kubahumuriza, kubafasha no guharanira amahoro aribyo bizadufasha kwirinda icyasubiza igihugu cyacu mu mahano ya Genocide.”
Umuvugizi wa ADEPR Bishop Sibomana Jean waje aherekeje aba baririmbyi nk’umushyitsi mukuru avuga ko ashimishimishwe na Chorale Betifague ku kuba yaratekereje kuza gusura urwibutso kugirango irusheho gusobanukirwa n’amateka yaranze Genocide yakorewe Abatutsi muri Mata 1994 , nk’imwe mu ntambwe izarushaho kubafasha gufatanya n’abandi banyarwanda mu kubaka igihugu cyabo barwanya ingengabitekezo ya Genocide .
Ati “Ni ikintu cyiza, kibaha gusobanukirwa neza no kumenya amateka ya Genocide, kuko baba babyiboneye n’amaso yabo cyane ko abenshi ntabyo bari bazi bitewe n’uko Genocide yabaye ari bato abandi bakaba babyumvaga gusa batarabisobanurirwa”.
Bishop Sibomana akomeza avuga ko aba baririmbyi bakwiye kureberwaho n’andi ma Chorale ari hirya no hino mu gihugu bagafatirwaho urugero nk’uru rwo kumenya, kuko uwamenye amateka mabi yaranze igihugu bimutera imbaraga zo kurwanya ingengabitekerezo ya Genocide hirindwa ko ibyabaye byazongera kubaho ukundi.
Chorale Betifague igizwe n’abaririmbyi bagera kuri 60 bagizwe n’ingeli zitandukanye, aho abubatse bageze ku ikigero cya 75%, urubyiruko bakaba 25, ariko ikaba imaze kunyurwamo n’abaririmbyi bangana na 186.
Yatangiye mu 1998, itangira ari chorale y’urubyiruko rwiganjemo abana bato bari bakiga mu mashuri abanza aho yatangiye iririmba mu ishuri ryo ku icyumweru. Imaze kugira ibihangano bitandukanye birimo iby’amashusho(video) n’amajwi(audio) byakozwe muri 2010 ku muzingo wiswe “ Niwowe ntumbero yanjye ”.
Kanda hano ujye ubona amakuru yihuse kandi kugihe kuri Facebook no kuri twitter
Andi Mafoto:
Mecky Kayiranga/bwiza.com
