Abarwanyi b’umutwe witwaje intwaro wa M23 bagaragaye bivuga imyato nyuma yo gufata agace ka Kitshanga gaherereye muri teritwari ya Masisi, intara ya Kivu y’Amajyaruguru muri Repubulika ya Demukarasi ya Congo, RDC.
Amakuru y’ifatwa rya Kitshanga yakwirakwiye kuri uyu wa 26 Mutarama 2023 nyuma y’imirwano ikomeye imaze iminsi hagati y’abarwanyi ba M23 n’ingabo za RDC zifatanya n’indi mitwe nka Mai Mai na FDLR, hamwe n’abacancuro.
Perezida wa M23, Bertrand Bisimwa, yashyize hanze amashusho agaragaza abarwanyi b’uyu mutwe bemeza ko bamaze gufata Kitshanga, ndetse basobanura ko babikoze mu rwego rwo guhagarika jenoside.
Umwe muri aba barwanyi, agaragara yitakuma, yazamuye imbunda ye ya AK-47 n’akaboko ke k’iburyo, agira ati: “M23 dufashe Kitchanga. M23 oyeee!”
Mugenzi we wari umukurikiye ubwo binjiraga muri santere ya Kitchanga, ahetse imbunda ya RPG. Mu ijwi rituje ariko riherekejwe n’abakanyamuneza mu maso, yagize ati: “Njyewe nk’umusirikare wa M23, ndishimye cyane ko tubohoye Kitshanga. Bagenzi bacu bari bababaye cyane ariko Imana iradufashije twinjiyemo. Twebwe dukunda amahoro, turashaka kugarura amahoro mu gihugu cyacu.”
Rwagati muri santere ya Kitshanga, abarwanyi ba M23 bamaze kuhagera bahacinyiye akadiho mu ndirimbo rusange z’abasirikare zizwi mu karere k’ibiyaga bigari, mu rurimi rw’Igiswahili n’Ikinyarwanda.
M23 yagaragaje abarwanyi bayo bahagaze inyuma y’intwaro nyinshi z’ubwoko butandukanye zirimo AK-47, mashini gani (machine gun) z’ubwoko burenze bumwe, RPG ndetse n’amasasu mashya afunitse arimo za roketi.
N’ubwo abarwanyi ba M23 bafashe Kitshanga, birasa n’aho urugamba rutarangiye kuko umutwe witwaje intwaro wa APCLS uyoborwa na Janvier Karairi na NDC-R iyoborwa na Guidon Shimiray yarahiriye kujya guhangana na bo.
