Igisirikare cy’u Burusiya cyatangaje ko cyapfubije misile zarashwe n’intwaro kabuhariwe za HIMARS zakorewe muri Leta zunze ubumwe za Amerika (USA), kirasa indege 11 za Ukraine zitagira abapilote.
Umuvugizi w’iki gisirikare, Lt Gen. Igor Konashenkov yatangaje ko iki gikorwa cyakozwe n’ingabo zabo zirwanira mu kirere ziri ku rugamba muri Leta ya Luhansk muri Ukraine, tariki ya 14 Gashyantare 2023.
Yagize ati: “Mu masaha 24 ashize, ubwirinzi bw’ibitero byo mu kirere bwarashe roketi 8 za HIMARS n’indege 11 zitagira abapilote za Ukraine hafi ya Sofiyevka, Popovka, Golikovo, Novokrasnyanka, Kremennaya, Zhitlova na Chervonopopovka muri Repubulika ya Luhansk.”
Lt Gen. Konashenkov, nk’uko ibiro ntaramakuru TASS by’Abarusiya bibivuga, yatangaje ko kandi ingabo z’u Burusiya zishe cyangwa zikomeretsa izigera ku 100 za Ukraine mu mirwano yabereye mu gace ka Kupyansk mu masaha 24 yashize.
HIMARS ni zimwe mu ntwaro zikomeye ingabo za Ukraine zifashisha muri iyi ntambara. Yazihawe na Leta zunze ubumwe za Amerika kugira ngo izifashishe mu guhangana n’ibitero byo mu kirere.
