Perezida Paul Kagame usanzwe ari Umugaba w’Ikirenga w’Ingabo z’u Rwanda (RDF), yakoze impinduka mu buyobozi bukuru bwazo zasize Gen Jean Bosco Kazura wari Umugaba Mukuru wazo na Maj Gen Murasira Albert wari Minisitiri w’Ingabo bahinduriwe imirimo.
Iby’izi mpinduka byatangarijwe mu itangazo ryasohowe n’Ibiro by’Umukuru w’Igihugu mu ijoro kuri uyu wa Mbere tariki ya 05 Kamena 2023.
Ni itangazo rivuga ko Juvenal Marizamunda yagizwe Minisitiri w’Ingabo z’u Rwanda, asimbuye Maj Gen Albert Murasira wari kuri uwo mwanya kuva mu Ukwakira 2018.
Marizamunda yari asanzwe ari Komiseri Mukuru w’Urwego rw’Igihugu rushinzwe Igorora (RCS), umwanya yagiyeho mu 2021 avuye muri Polisi y’u Rwanda.
Marizamunda yahoze ari umusirikare kuko yimuriwe muri Polisi mu 2014, icyo gihe yari afite ipeti rya Lieutenant Colonel.
Mu zindi mpinduka Lt Gen Mubarakh Muganga wari usanzwe ari Umugaba w’Ingabo zirwanira ku butaka yagizwe Umugaba Mukuru w’Ingabo z’u Rwanda; akaba yasimbuye kuri uyu mwanya Gen Jean Bosco Kazura wari ufite uyu mwanya kuva muri 2019.
Umwanya w’Umugaba w’Ingabo zirwanira ku butaka wahise uhabwa Maj Gen Vincent Nyakarundi wari usanzwe akuriye ubutasi bwa gisirikare muri RDF.
Ni Nyakarundi wahise asimburwa na Colonel Franà§ois Régis Gatarayiha wari umwungirije; mbere y’aho akaba yarayoboye inzego zirimo urw’abinjira n’abasohoka ndetse na RURA.
Impinduka zakozwe kandi zasize Maj Gen Alex Kagame wayoboraga Ingabo mu ntara y’Uburengerazuba agizwe Umuyobozi w’ibikorwa by’Inzego z’Umutekano z’u Rwanda muri Mozambique, abisikana na Maj Gen Eugène Nkubito.
Colonel Théodomir Bahizi we yagizwe Umuyobozi ushinzwe ibijyanye n’urugamba mu Ngabo z’u Rwanda ziri muri Mozambique, na ho Lt Col Augustin Migabo yazamuwe mu ntera ahabwa ipeti rya Colonel mbere yo kugirwa Umuyobozi wungirije w’umutwe udasanzwe w’Ingabo z’u Rwanda, Special Force Command.
RCS yayoborwaga na Marizamunda yahawe Brig Gen Evariste Murenzi, uyu akaba yari asanzwe ari Umuyobozi wungirije wa diviziyo ishinzwe ibikorwa byihariye.
Ni mu gihe Jean Bosco Ntibitura we yagizwe Umuyobozi Mukuru mu Rwego rushinzwe Iperereza n’umutekano w’igihugu (NISS) ushinzwe umutekano w’imbere mu gihugu.
