Minisiteri y’Umutekano w’Imbere mu Bufaransa yatangaje ko yitabajaje abashinzwe umutekano 45,000; mu rwego rwo guhangana n’abaturage b’i Paris bakajije imyigaragambyo.
Ni imyigaragambyo ikomeye yadutse mu Bufaransa nyuma y’urupfu rw’umusore w’imyaka 17 y’amavuko warasiwe na Polisi mu gace ka Nanterre ku wa Kabiri w’iki cyumweru.
Gutwika amazu n’imodoka ndetse no gusahura inzu z’ubucuruzi biri mu bikomeje kuranga iyi myigagarambyo.
Usibye Umujyi wa Paris, imyigaragambyo kandi iri no kubera mu yindi mijyi nk’uwa Marseille, Lyon, Toulouse, Strasbourg na Lille.
Abigaragambya barimo bamagana urugomo ndetse n’ivangura rikomeje gukorwa na Polisi y’u Bufaransa.
Nko mu mujyi wa Marseille wa kabiri munini mu gihugu, Polisi yatangaje ko ku wa Gatanu abigaragambya basahuye ububiko bw’intwaro batwara imbunda, gusa zikaba nta masasu zari zifite.
Kugeza ku munsi wejo abantu barenga 1100 bari bamaze gutabwa muri yombi.
Ibikorwaremezo bitabarika birimo amaguriro, za farumasi n’ibindi bimaze gutwikwa n’abaturage, mu gihe abapolisi babarirwa muri 300 bari bamaze gukomereka.
Ibi byatumye ubuyobozi bufata ingamba zo kongera abashinzwe umutekano kugira ngo bahangane n’aba bigaragambya.
Ku wa Gatanu nijoro, Abapolisi n’Abajandarume ibihumbi 45 boherejwe mu bice bitandukanye by’Umujyi wa Paris, bafite intwaro, kugira ngo barwanye aba bigaragambya.
