Abasirikare n’abacungagereza barenga 60 bo muri Guinée-Conakry birukanwe, nyuma y’uko Capitaine Moussa Dadis Camara wahoze ari Perezida w’iki gihugu atorotse gereza.
Ku wa Gatandatu w’icyumweru gishize ni bwo Capt. Camara yacikishijwe gegereza yo mu murwa mukuru Conakry yari afungiyemo, gusa nyuma y’amasaha make ashakishwa yongera gufatwa arafungwa.
Ubutegetsi bwa Guinée buvuga ko abirukanwe bazira “kwica amategeko y’akazi ndetse n’imyitwarire mibi.”
Capitaine Moussa Dadis Camara na bagenzi be babarirwa mu icumi bashinjwa kugira uruhare mu bwicanyi bwo muri 2009 bwakurikiye coup d’état yakoze muri 2008.
Icyo gihe abantu barenga 150 batari bamushyigikiye biciwe mu myigaragambyo, na ho abagore barenga 100 basambanyirizwa ku ngufu muri Stade y’i Conakry.
Ku wa Gatandatu ubwo uriya mugabo yacikishwaga n’abarwanyi bari bitwaje intwaro ziremereye umunyamategeko we yavuze ko abamucikishije babikoze ku mbaraga.
Capitaine Moussa Dadis Camara yategetse Guinée-Conakry hagati ya 2008 na 2010, mbere yo gusimburwa ku butegetsi na Prof. Alpha Condé.
