Umuryango FPR Inkotanyi urateganya kubaka igihugu gishingiye ku iterambere ry’umuturage , kongera ibyoherezwa mu mahanga no kubaka inganda zikomeye zizaba ibisubizo ku bibazo byagiye bigaragara mu Rwanda byo kudakora ku Nyanja.
Kudakora ku nyanja n’imwe ni imwe mu ngaruka zikomeye zigira uruhare ku iterambere ry’u Rwanda n’iry’umuturage kuko usanga ibicuruzwa byavuye mu mahanga bitwarwa ku buryo bugoranye bunahenze bw’imihanda yo ku butaka, kurusha uko byahenduka bicishijwe mu mazi.
Ni muri urwo rwego FPR Inkotanyi itangaza ko izongera inganda mu gihugu ikongerera ubushobozi izikora bimwe mu bicuruzwa n’ibikoresho by’ibanze nkenerwa mu Rwanda, mu gihe yaba itsindiye kuyobora u Rwanda muri manda ya 2017-2024.
[xyz-ihs snippet=”google-pub”]
Muri manifesto yayo y’iyo myaka igira iti “ Ku bufatanye n’abikorera, hazubakwa inganda nshya hanongererwe ubushobozi inganda zitandukanye zifasha guteza imbere ibikorerwa mu Rwanda no guhanga imirimo ku Banyarwanda, harimo; Uruganda rukora imiti; urukora inzitiramibu; Inganda zikora ibikoresho by’ubwubatsi; uruganda rukora amafumbire; urukora ibyo gupfunyikamo ibicuruzwa (packaging materials). Hari kandi izikora imyenda; izitunganya impu n’izindi zitunganya ibikomoka ku buhinzi n’ubworozi.
Muri uko guteza imbere inganda bizajyana no kongera ibyoherezwa mu mahanga no kongera guteza imbere imijyi, icyaro n’imyubakire, hongerwe n’ ibikorwa remezo bizamura ubuhahirane. Hazatezwa imbere imijyi, icyaro n’imyubakire, hagamijwe imibereho myiza ya bose.
Ni mu ntego FPR Inkotanyi yihaye igira iti “ Umuryango FPR- Inkotanyi ugamije kwihutisha iterambere ry’ubukungu bugera kuri bose bushingiye ku ishoramari ry’abikorera, ku bumenyi no ku mutungo kamere. “
Muri ibyo bikorwa biteganyijwe mu bukungu, hazongerwa umusaruro w’ubuhinzi n’ubworozi mu bwinshi no mu bwiza. Hazibandwa kandi ku kubyaza umusaruro umutungo, guteza imbere ubukungu bushingiye kuri serivisi , guhanga imirimo ibyara inyungu hagamijwe kuzamura ubukungu no kwihutisha iterambere ry’ubukungu.
Hazongerwa umubare w’abize ubumenyingiro, buhujwe n’ibikenewe ku isoko ry’umurimo, hanatangwe ibibafasha gutangira umurimo.
Hazashyirwaho umushinga w’icyitegererezo ubyara inyungu kuri buri mudugudu
Hazubakwa ubushobozi bw’Abanyarwanda mu guhanga, gutegura no gushyira mu bikorwa imishinga, hashyirweho n’uburyo bufasha guteza imbere imishinga y’ikoranabuhanga no guhanga ibishya.
“Hazashyirwaho gahunda yo guteza imbere guhanga imirimo, hashyirwaho umushinga w’icyitegererezo ubyara inyungu kuri buri mudugudu.”
Hazashyirwaho gahunda yo kunoza imicungire n’imiyoborere y’amakoperative, hubakwa ubushobozi bwazo.
Abanyarwanda nibura 1000 bazajya bimurwa buri mwaka
FPR Inkotanyi ikomeza igaragaza ko hazashyirwaho uburyo bworohereza Abanyarwanda gutura heza habugenewe, bijyanye n’igihe n’ubushobozi bwabo harimo n’abatuye mu tujagari.
Abanyarwanda batuye mu cyaro bazatuzwa ahabugenewe, mu midugudu itunganyije ijyanye n’iterambere.
“Abanyarwanda batuye mu manegeka bazatuzwa neza n’aho batuye havugururwe, ku bufatanye n’Abikorera. Hazimurwa nibura imiryango 1,000 buri mwaka.”
Amazi n’amashanyarazi bizagezwa kuri bose, kandi hakoreshejwe uburyo butangiza ibidukikije. Hazashyirwaho amatara yo ku mihanda iduhuza n’ibindi bihugu ndetse no ku mihanda minini yo mu migi.
Serivisi zo gutwara abantu n’ibintu mu cyaro
Nyuma y’ibyakozwe mu gutwara abantu n’ibintu,ngo hazongerwa uburyo bwo gukomeza kubinoza, ni ukuvuga serivisi zo gutwara abantu n’ibintu mu mijyi no mu cyaro.
Mu rwego rwo guteza imbere ibyo bice,hazubakwa amakusanyirizo n’imiyoboro y’imyanda mu migi, n’ibimpoteri mu cyaro, hashyirweho n’uburyo bwo kuyibyaza umusaruro.
Ku bufatanye n’Abikorera, hazashorwa imari mu mishinga minini yongera umusaruro w’ibyoherezwa mu mahanga, hashyirweho gahunda yihariye ituma inzego za Leta zose zorohereza Abikorera kohereza ibicuruzwa mu mahanga.
Ubuhahirane n’amahanga
Iyi manifesto ikomeza igaragaza ko hazakomezwa guhuza u Rwanda n’Ibihugu by’Akarere, hakoreshejwe imihanda, gari ya moshi, ikibuga cy’indege cya Bugesera n’ibyambu mu kiyaga cya Kivu, ndetse hanongerwa amasoko ya kijyambere ahuza imipaka y’u Rwanda n’Ibihugu ruhana nabyo imbibi.
Hazakomezwa guteza imbere ubuhahirane n’ubucuruzi, hagamijwe guteza imbere no kwagura isoko ry’ibyo u Rwanda rwohereza mu Karere no mu mahanga , nka COMESA, EAC, SADC, Northern Corridor, ECCAS n’iyindi.
Hazubakwa icyambu kidakora ku mazi (dry port), mu rwego rwo korohereza abacuruzi kubika, kwohereza no gutumiza ibicuruzwa mu mahanga, n’ibindi byambu u Rwanda rufite mu mahanga.
Abanyarwanda bose bazafashwa kwizigamira no guteganyiriza izabukuru ku badafite umushahara
Abanyarwanda bose bazegerezwa serivisi z’imari hakoreshejwe ikoranabuhanga. Hazashyirwaho uburyo bwo gufasha Abanyarwanda bose kwizigamira no guteganyiriza izabukuru ku badafite umushahara. Hazongerwa umusaruro ukomoka ku bukerarugendo bushingiye ku muco no ku bwiza bw’u Rwanda ku buryo uzikuba kabiri, hashingiwe ku ishoramari mu mishinga minini itandukanye.
Hazatezwa imbere ubuhanzi, ubugeni, muzika, filime n’ubumenyi bushingiye ku muco nyarwanda, binabyazwe umusaruro.
Ku bufatanye n’Abikorera hazongerwa ubuso bw’ubutaka buhujwe n’ubwuhirwa; hatezwe imbere ikoreshwa ry’imashini mu buhinzi. Ubuso bukorwaho amaterasi y’indinganire buzikuba kabiri bunabyazwe umusaruro. Hazongerwa imbaraga mu bukangurambaga bugamije guhindura imyumvire mu bahinzi n’aborozi, by’umwihariko mu bijyanye no kuhira. Buri mwaka, ubutaka bwuhirwa buzongerwaho 12%.
Umubare w’abahinzi bakoresha ifumbire mvaruganda n’imbuto z’indobanure uzikuba kabiri;. Hazashyirwa imbaraga mu bushakashatsi bugamije kwongera ubwiza n’ubwinshi bw’umusaruro uturuka mu buhinzi n’ubworozi.
Ku bufatanye n’Abikorera, hazubakwa ubuhunikiro bw’imyaka hirya no hino mu gihugu, hagamijwe ko nta musaruro wangirika mu gihe cy’isarura, ndetse no kongera ubwiza bwawo.
Hazihutishwa ishyirwa mu bikorwa rya gahunda yo kongera umusaruro uturuka mu bihingwa bifite agaciro kanini, harimo ubuhinzi bw’indabo, imboga, imbuto ziribwa n’ibindi.
Mu gihe abahinzi bakunze gutaka kutabona ibigo by’imari n’iby’ubwishingizi bibafasha kunoza ubuhinzi bwabo, hazashyirwaho uburyo bwo korohereza abahinzi n’aborozi kubona no gukoresha serivisi z’imari mu kuzamura umusaruro.
Hazubakwa ubushobozi bw’abaturage bacukura amabuye y’agaciro, hatezwe imbere ishoramari byongera umusaruro n’imirimo.
Umutungo kamere w’igihugu uzashyirwa ahabona
Hazakorwa ubushakashatsi bwimbitse mu Gihugu hose, bugamije kumenya umutungo kamere w’Igihugu. Umusaruro ukomoka ku bucukuzi bw’amabuye y’agaciro uzongererwa agaciro binyuze mu nganda.
Mu rwego rwo kwihaza no kugabanya imirire mibi, hazashyirwa imbaraga mu gutera ibiti by’imbuto ziribwa bitandukanye.
[xyz-ihs snippet=”google-pub”]
Hazagabanywa umubare w’abaturage bakoresha inkwi ku kigero cya 50%, hakoreshejwe uburyo bunyuranye harimo gaz, boigaz, amashyiga ya rondereza, n’ibindi.
Mu bindi bizakorwa birimo umushinga wo gukemura ikibazo cy’amazi aturuka mu birunga n’indi migezi yangiza ibidukikije n’ibintu, hashakwa uburyo bwo kuyabyaza umusaruro ndetse no guharanira ibikorwa byose by’iterambere byubahiriza ibisabwa mu guhangana n’imihindagurikire y’ibihe
Uretse iyi manifesto yayo, Umuryango FPR Inkotanyi watangaje ko uzakomeza gukora n’indi mitwe ya Politiki mu kureba ibitekerezo n’imigambi myiza bizaba biri muri manifesto zayo zigamije gukomeza guteza imbere igihugu.
Kanda hano ujye ubona amakuru yihuse kandi kugihe kuri Facebook no kuri twitter
Ntakirutimana Deus
