Umuvugizi w’ishami rya gisirikare ry’umutwe wa M23, Lt Col Willy Ngoma, yanyomoje amakuru avuga ko hari uduce mu two uriya mutwe waherukaga kwigarurira ihuriro ry’ingabo za Guverinoma ya RDC ryaba ryamaze kwisubiza.
Lt Col Ngoma yakomozaga ku makuru amaze iminsi avuga ko FARDC n’abo bafatanya ku rugamba baba baherutse kwambura M23 agace ka Shasha ko muri Teritwari ya Masisi.
Ni agace kari ku muhanda uhuza imijyi ya Goma, Sake na Bukavu M23 yafunze mu mpera z’icyumweru gishize.
Usibye Shasha, Minisitiri w’Itumanaho wa RDC akanaba Umuvugizi wa Guverinoma y’iki gihugu, Patrick Muyaya, yaraye abwiye itangazamakuru ko Ingabo za Leta zisubije agace ka Kirotshe kari muri twinshi inyeshyamba zigaruriye ku wa Mbere w’iki cyumweru.
Ni amakuru cyakora yanyomojwe na Lt Col Willy Ngoma wabwiye BWIZA ko “bitandukanye n’ibiri kuzenguruka kuri murandasi, iri huriro nta na santimetero n’imwe y’uduce twabohowe na M23 ryigeze ryisubiza”.
Lt Col Willy Ngoma yavuze ko kuri ubu impande zombi ziramukiye mu mirwano iri kubera mu gace ka Nturo, nyuma y’uko ihuriro ry’ingabo za Leta riteye ibirindiro bya M23 bigaherereyemo.
