Rutahizamu w’ikipe y’igihugu Amavubi, Dany Usengimana yasinyiye ikipe nshya yitwa AS Laval.
Uyu rutahizamu yasinyiye iyi kipe ikina mu Cyiciro cya Mbere muri shampiyona y’Intara ya Québec n’ubundi yo muri Canada.
Abinyujije ku mbugankoranyambaga ze, Danny Usengimana yatangaje ko yabonye ikipe nshya.
Yagize ati: “Ntuzigere ucika intege mu buzima, urakoze Mana ku bw’amahirwe meza wampaye yo gukorera hanze akazi nkunda cyane, wafunguye umuryango munini kandi nta muntu ushobora kuwufunga, ukwiye amashimwe yanjye kandi Urakoze”.
Amakuru avuga ko uyu mukinnyi yasinye muri iyi kipe amasezerano angana n’igihe kingana n’umwaka umwe.
AS Laval isanzwe ikina shampiyona y’icyciro cya mbere yo mu Ntara yo muri Canada ya Québec, ikaba yarashinzwe mu 1966 yitwa AS CS Monteuil gusa muri 2021 ikaza guhindurirwa izina ikitwa AS Lavar.
Mu kwezi kwa 7 mu mwaka ushize wa 2023 nibwo Dany Usengimana yari yarekeje muri Canada asanzeyo umugore we, Nyangabire Francine nyuma y’uko amasezerano ye yari amaze kurangira mu ikipe ya Police FC kandi nta kipe afite.
