Bwa mbere ku mugabane wa Africa byumwihariko mu gihugu cy’u Rwanda hazabera ibirori bikomeye cyane bitegurwa n’Ishyirahamwe mpuzamahanga ry’imodoka zo gusiganwa ‘FIA’ rifite icyicaro gikuru i Paris mu Bufaransa.
Buri mwaka iri FIA itegura ibihembo byo guhemba abakinnyi baba baritwaye neza mu marushanwa yo gusiganwa ku modoka agiye atandukanye ku isi.
Iyo amarushanwa yose y’umwaka arangiye, mu kwezi kwa 12 ‘FIA’ itegura ibirori bikomeye cyane byo guhemba abitwaye neza mu byiciro bitandukanye. Ibi birori bizwi nka ‘The FIA Prize Giving.’
Uyu mwaka rero tariki ya 13 Ukuboza ibi bihembo bizatangirwa i Kigali mu Rwanda.
Ni ku nshuro ya Mbere ibi bihembo bizaba bitangiwe ku mugabane wa Africa.
Biteganyijwe ko ibihangange n’ibyamamare byose muri uyu mukino ndetse na Sosiyete zikomeye cyane zitera inkunga ‘FIA’ bose bazaba bateraniye i Kigali mu Rwanda mu Ukuboza.
Ibinyujije ku mbuga nkoranyambaga zabo, FIA yatangaje ko umuhango wo gutanga ibihembo bya FIA 2024 uzabera mu Rwanda.
Ibi bihembo bije mu Rwanda mu gihe i Baku muri Azerbaijan hari kubera irushanwa rya ‘Fomula 1’.
Ibi bihembo bihuriramo ibihangange biturutse mu marushanwa arimo FIA Formula One World Championship, the FlA World Rally Championship, The ABB FIA Formula E World Championship, The FIA World Endurance Championship, The FIA World Rallycross Championship, The FIA World Rally Raid Championship na The FIA World Karting Championships.
