Ubwongereza bwatangaje ko bitarenze taliki 24 Nyakanga 2024 abimukira n’abasaba ubuhungiro baba muri iki gihugu aribwo bazoherezwa mu Rwanda.
Byatangajwe na Edward Brown usanzwe ari umuvugizi wa Guverinoma kuri uyu wa Mbere, nyuma y’uko Minisitiri w’Intebe w’iki Gihugu, Rishi Sunak atangaje ko iyi gahunda izatangira gushyirwa mu bikorwa nyuma y’amatora ateganyijwe tariki 04 z’ukwezi gutaha kwa Nyakanga.
Abanyamategeko ba Guverinoma, binyuze mu nyandiko bagejeje i Londre mu Bwongereza batangaje ko guhera taliki 23 indege zizaba ziteguye.Ubusanzwe gahunda yo kohereza mu Rwanda abimukira igamije guca integer abimukira binjira muri iki Gihugu cy’u Bwongereza mu buryo bunyuranyije n’amategeko, bakoresheje ubwato buto banyuze mu Bufaransa.
Mu mpera z’umwaka ushize, Urukiko rw’Ikirenga rw’u Bwongereza rwari rwafashe icyemezo ko iyi gahunda inyuranyije n’amategeko, byanatumye Guverinoma z’Ibihugu byombi (u Bwongereza n’u Rwanda) zisinya andi masezerano avuguruye, ndetse akaba yaramaze kwemezwa.
Biteganyijwe ko abimukira 5700 ari bo bazoherezwa mbere mu Rwanda, hashingiwe ku biteganywa n’amasezerano y’ubufatanye mu iterambere no gukemura ibibazo by’abimukira yashyizweho umukono n’ibihugu byombi.
