Kuri uyu wa Kabiri, abarimu n’abanyeshuri 26 bo mu Ishuri Rikuru rya Gisirikare muri Senegal basuye Icyicaro gikuru cy’Ingabo z’u Rwanda (RDF). Bakiriwe mu izina ry’Umugaba Mukuru wa RDF, n’Umuvugizi w’ingabo, Brig Gen Ronald Rwivanga wabasobanuriye urugendo rwo guhindura RDF n’umutekano mu karere.
Izi ntumwa zigizwe n’abanyeshuri bo muri Senegal, Maroc, Mauritania, Camerun, Tchad, Togo, Cote d’Ivoire bari mu rugendoshuri mu Rwanda kuva ku itariki ya 23 – 29 Kamena 2024, ziyobowe na Kapiteni w’ingabo zirwanira mu mazi, Baye Meissa KHOULE, Umuyobozi wungirije w’Ishuri Rikuru rya Gisirikare muri Senegal.
Kapiteni KHOULE yagize ati: “Twaje hano kwigira ku Ngabo z’u Rwanda, kureba imikorere yabo, no gusobanukirwa uburyo abaturage b’u Rwanda batsinze imbogamizi kugira ngo babe icyitegererezo ku mugabane.”
Kuwa Mbere, izo ntumwa zunamiye abazize Jenoside yakorewe Abatutsi mu 1994 ku Rwibutso rwa Jenoside rwa Kigali nyuma baza gusura Inzu ndangamurage y’ubukangurambaga bwo kurwanya jenoside.
Gahunda y’izo ntumwa ikubiyemo kandi gusura Ishuri rya gisirikare ry’u Rwanda rya Gako ndetse n’ibindi bigo byinshi bya Leta ndetse n’abikorera.
